Aclareacion riba awa sushi
ORANJESTAD (AAN): Den edicion di Diaranzon a sali publica e informe con awa sushi ta keda stagna riba Irausquin Boulevard net dilanti Highrise Hotelnan. Un funcionario di DOW a indica cu e pomp cu tin instala riba e boulevard aki pa atende e sistema di riolering, ta keda pega debi cu azeta sushi di cushina ta wordo basha den awa cu ta bay den e sistema aki.
Diferente Hotel local a confirma na DIARIO, cu nan no ta manda ningun azeta den e sistema di riool. Nan tin asina yama “grease traps” cu ta funcionando constantemente, y tur esaki ta sistemanan cu ta wordo bon manteni y e filtermento aki ta evita cu azeta of grease ta bay hunto cu awa di riool pa e sistema di DOW.
DOW tambe a confirma den e articulo publica Diaranzon, cu Hotelnan a bisa cu nan sistema di “used oil trap” ta funciona bon. Pues ta di un otro fuente e azeta aki lo ta bin, y aki algun di nan ta pensa riba e tantisimo Restaurant y Bar cu tin riba e pida zona di Palm Beach aki.
E pomp aki a wordo construi den zona di tempo di ex-Concorde Hotel, y ta uno di nan cu ta wordo afecta pa azeta na varios ocasion durante aña. Den e edicion di Diaranzon, a menciona cu e pomp aki ta situa dilanti di Riu Hotel. Esaki kizas lo a pone hende pensa cu ta Riu Hotel so ta conecta riba e pomp, y esey no ta berdad. Ta tur hotel na Palm Beach ta conecta riba dje. Gerencia di Riu Hotel a confirma na DIARIO cu nan tambe ta tuma e asunto aki hopi na serio, y nan grease traps ta funcionando 100% perfecto y no ta laga nada di azeta bay den awa di riool.
