Estadisticanan pa luna di october 2023 di HOH
*Durante luna di october a hospitalisa 833 pashent
ORANJESTAD (AAN): Horacio Oduber Hospital un bes mas ta saca su estadisticanan pa loke ta luna di october 2023 cual ta brinda transparencia na comunidad di Aruba. E cifranan aki ta pa duna un indicacion di loke ta sosode na nos Hospital pa loke ta cuido, e parti di diagnostico y tambe donacion di sanger.
Durante luna di october 2023 a hospitalisa 833 pashent cual ta mas cu na luna di september cu tabata 786 pashent. Di e 833 pashent hospitalisa un total di 471 a drenta cu emergencia. Cada pashent cu a hospeda den Hospital a keda un promedio di 4,3 dia y durante luna di october e ocupacion di cama tabata na 91%.
A tuma luga 552 operacion cual ta 70 operacion menos cu na luna di september. A nace un total di 80 baby (39 mucha muhe y 41 mucha homber) na october. Y tambe na october nos heroenan a pasa Bloedbank y a haci un total di 265 donacion di sanger cu ta 51 donacion mas cu na september.
Departamento di Emergencia a mira na october un total di 2.629 pashent, cual un total di 42% NO tabata pashent cu caso di emergencia.
Specialistanan den servicio di HOH a haci un total di 6.010 consulta cu pashent na e diferente policlinicanan na oktober. Departamento di Radiologia a haci un total di 4.627 test manera CT scan, MRI y mas. Un total di 11.389 persona a bay departamento di LABHOH pa haci nan test cual ta 241 persona mas cu na luna di september. Y un total di 822 pashent a sali for di Hospital.
Danki na tur cu ta brinda cuido safe y cordial na Hospital 24/7 demostrando diariamente cu HOH semper t’ey pa comunidad y tambe turista!
