ORANJESTAD (AAN): Por a constata cu e cantidad di personanan interna ta sigui bay den aumento. Dr. Yuri Casseres di Dr. Horacio Oduber Hospital
a indica cu tin un acuerdo cu Colombia y cu Corsow, den caso cu e capacidad ta limita y na Aruba no tin lugar pa e pashent.
Den un caso asina e pashent por bay Colombia. E ta bayendo bon y e areglo cu un hospital na Colombia ta encera cu si acaso e unidad di cuido intensivo na Aruba ta yen, cu por transporta e pashent pa Colombia, Dr. Casseres a indica.
El a bisa cu berdad tin un lista di spera pa AZV, pero esaki ta pashentnan cu ta hopi malo cu mester cuido di emergencia. Na Colombia ta reserva un par di cama pa e pashentnan di Aruba, a bisa.
E otro scenario ta cu por manda e pashentnan Corsow, dependiendo di Corsow su capacidad. Na Corsow tambe e casonan ta halto y no tur ora tin lugar pa tuma e pashentnan di Aruba. Manera cu a haci den pasado cu nan pashentnan, Dr. Casseres a mustra.
E otro plan cu Hospital tin ta e 'opschalingsplan'. A traha esaki den pasado y esaki lo por wordo activa pa asina den Hospital mes crea mas posibilidad pa e pashentnan por keda Aruba. Pero esey ta depende mas tanto di e personal, Dr. Yuri Casseres a declara.
