Horcan Fiona a basha viaducto di highway abao y cuatro Aeropuerto ta cera

Diez area a keda sin coriente

SANTO DOMINGO: Horcan Fiona a trece yobidanan torencial, y biento fuerte riba Republica Dominicana.  Dialuna mes, un di e viaductonan di Autopista Duarte na La Vega, a basha bin abao.  No tabatin ningun vehiculo riba dje, como cu e viaducto aki tin 2 luna for di servicio.

   Pues e caida di e viaducto aki lo no bay afecta trafico, como cu pa dos luna caba tin ruta alternativo pa pasa e area aki.

   Pero e ta mustrabo e forza cu Horcan Fiona tin.  El a laga varios material atras ora di a pasa riba e pais, principalmente poblacion na costa banda pariba di e pais.

   Oficina Nacional di Meteorologia ta calcula cu Horcan Fiona a basha como 279.4 milimeter di awa acumula riba e pais.

   Un homber di pueblo di San Jose de Matanzas, di e municipio di Nagua, na provincia Maria Trinidad Sanchez, a bira e prome victima di Horcan Fiona cu a perde su bida.  Isidro Quiñones di 65 aña di edad a sali pafo den patio di su cas pa drecha un plachi di zink cu tabata bati sin fin riba dak, y net e ora ey un palo grandi di mata a cay riba dje.  Biento fuerte a pusha full e palo di mata bin abao.

   Rond di Republica Dominicana tin masha hopi raportahe di palonan di mata cu a sali cay.  Tambe hopi cas na e pais di Merengue ta usa portanan grandi di hero como entrada di nan garage.  Hopi di e portanan aki tambe ta benta tur caminda rond riba caya of den cura di cas di hendenan.  Biento fuerte a hisa e portanan pisa aki zwaai nan un banda.

   Autoridadnan riba Dialuna atardi, a indica cu diez area a keda sin coriente.  Esey ta igual na como 11.554 cas cu ta sin coriente.  E compania a bisa cu varios waya di tension halto a wordo kibra door di biento fuerte, y lo bay dura un poco pa drecha tur esey.  Polis a registra cu tin 54 cas cu a wordo destrui of severamente afecta pa biento y awacero.

   Varios caminda ta bao awa, y trafico no por pasa.  Pa colmo na diferente lugar tin palo di luz benta riba caminda, y esey ta blokea full e fluho di auto y vehiculonan di rescate.

   Gobierno a instrui nan Departamento di Aviacion Civil, pa suspende operacion na tur e cuatro Aeropuertonan na e parti pariba y panort di e pais.  Dialuna atardi ainda tabata cera e Aeropuerto Internacional di Punta Cana, Aeropuerto Internacional di La Romana, Aeropuerto Internacional di Catey, y Aeropuerto Internacional di Arroyo Barril, tur dos na Samana.