Horcan Beryl a intensifica den un tormenta extremo peligroso awor cu e ta drentando Caribe

E lo ta pasando Diamars panort di Aruba

• Autoridadnan na Aruba ta pidi publico no bay den panico 

ORANJESTAD (AAN): E climax di varios Ola Tropical mey-mey di Oceano Atlantico cu a aparece na final di Juni, tabata comosifuera cu ya luna di Augustus a yega!  Pasobra ta den augustus so tin custumber di mira situacion asina.

   Uno di nan cu siman pasa tabata un Ola Tropical, a escala y a bira Depresion Tropical 2... y apenas algun ora despues riba Diabierna anochi a nace y bira Tormenta Tropical Beryl.

   Beryl a conoce un concentracion fuerte cu a pone sigui crece, y ya caba Diasabra el a intensifica y haya status di Horcan.

   Horcan Beryl a sigui pasa for di uno di Categoria 1, bay over mesora pa uno di Categoria 2, sigui pa 3, y ya riba diadomingo mainta el a haya bientonan sosteni maximo cu ta pushe den Categoria 4.

   Categoria 4 ta pa Horcan cu in biento maximo sosteni di entre 209 te cu 251 km/h.

   Diadomingo atardi pa 5:00 pm, e centro di Horcan Beryl tabata na 11.1º Nort y 56.5º West, cu ta 400 km pariba di isla di Barbados.  E bientonan maximo sosteni ta di 215 km/h.  Horcan Beryl ta moviendo direccion West-Noordwest cu 30 km/h.

   Su presion central ta basta abao, esta di apenas 960 mb.

   Hurricane Warning a wordo emiti pa Barbados, St. Lucia, St. Vincent & The Grenadines, Grenada, y Tobago.

   Tropical Storm Warning ta emiti pa Martinique.

   Tropical Storm Watch a wordo emiti pa Dominica, Trinidad, costa zuid di Republica Dominicana, for di Punta Palenque bay pabao te na frontera cu Haiti.  Tambe a emiti Tropical Storm Watch pa costa zuid di Haiti.

   Si e sigui cu mesun velocidad ora e drenta Caribe, e lo bay ta pasando e ora panort di Aruba riba diamars den mainta te anochi panort di Aruba como un ‘Major Hurricane’.  Mayoria di maltempo lo bay ta panort di e wowo, pues aki Aruba tin suerte un biaha mas cu lo no sinti full e furia.  Pero toch ta bon pa publico keda alerto, pasobra por tin algun banchi di awacero cu lo por plama basta leu di e centro.  Pueblo conoce esaki como ‘rabo di horcan’, y tin di tene cuenta cune.

   Ora cu Horcan Beryl drenta Caribe riba Dialuna merdia, esaki por pone cu biento lo cay mesun dia na Aruba y awe y mañan lo por ta calor.

  Crisis Management Office (CMO) di Aruba, ta pidi publico pa no bay den panico como cu tur indicacion ta cu e wowo lo pasa na un distancia di como 530 km leu panort di e isla.  Pesey CMO no ta mira e necesidad pa na Aruba activa e ‘Crisis Team Nacional’ pa e presencia di Horcan Beryl.

   Nan lo keda vigila e movimento, y si acaso bin cualkier cambio inespera, nan lo informa publico di esey.

   Riba e potret di satelite visibel saca Diadomingo merdia 1:30 pm, por mira e grandura di Horcan Berryl algun cien kilometer pariba di Trinidad & Tobago.

   Tambe por mira mapa di e calculo ki ora e wowo di Horcan lo ta pasando panort di Aruba.  E emblema “M” nifica ‘Major Hurricane’.