Hopi movimento pa haci compras pa Dia di Mama

ORANJESTAD (AAN): E situacion financiero pa hopi hende aworaki durante luna di Mei, sigur no ta esun di mihor.

   Sinembargo semper e temporada di compras di regalo relaciona cu Dia di Mama, ta uno caminda comerciantenan ta bin cu oferta pa asina haya clientenan drenta nan negoshi, y cumpra y cumpra.

   E biaha aki, por a nota cu pa e weekend di Dia di Mama, toch tabatin hopi movimento.  Famianan canando hunto pa mira kico fabuloso nan por cumpra pa nan Mama.  Otronan a busca regalonan abstracto cu lo por bira e centro di atraccion riba Dia di Mama.  Otronan a busca regalo tradicional, manera flor, vaas, artefacto electrico, perfume, prenda.  Tin cu a busca comestible pa asina nan prepara un delicioso cuminda pa nan Mama.

   En corto, por a mira hopi cumpramento di regalo y comestible, pa asina celebra e Dia di Mama, feliz y contento.