Miriam Illidge di Sociale Zaken:
ORANJESTAD (AAN): Durante un conferencia di prensa riba Dia Internacional di Trabao Social, Miriam Illidge, trahador social na Departamento di Asuntonan Social (DAS) a duna palabranan di elogio, aprecio y respet na tur esnan cu ta traha den e area social.
“E mundo di yudanza social a inicia hopi aña pasa, na momento cu soeurnan y hendenan di bario tabata haci trabaonan caritativo y tabata sostene otro”.
Den transcurso di añanan e casonan a bira un tiki mas complica y esey a haci cu estudio y profesionnan a wordo crea.
Awe nos tin pues trahadornan social, psicologonan etc.
Mi kier enfatiza cu no solamente nos como trahador social y psicologonan ta eherce e bunita trabao, sino tin hopi hende den comunidad cu tras di pantaya tambe ta haci e trabaonan social, segun Illidge.
El a sigui bisa cu esaki ta inclui hende den bario, un tanta, un wela y tambe cierto instancia.
“Nos den veld no por haci e trabaonan ey nos so”.
Nos tin mester di un team anto pami esey ta entre otro un di e retonan cu mi kier menciona.
Traha hunto ta hopi importante, entre otro cooperacion entre instancianan.
Nos como Departamento di Asuntonan Social hamas por yuda clientenan nos mes, segun Illidge kende a sigui bisa cu scolnan mester traha hunto, Sociale Zaken mester comunica cu Voogdijraad y diferente otro instancia.
“E red ta hopi importante, pero e persona mas cardinal den henter esaki ta e cliente mes”.
Si e cliente no ta dedica na sigui e guia, nos ta keda para na mes caminda.
Nos tin cu corda cu e decision y responsabilidad final ta keda den man di nos clientenan, segun Illidge, kende a splica cu un otro reto importante cu nan tin ta pa educa e pueblo.
No por mantene nos pueblo ‘bobo’.
Ora cu bo educa bo pueblo, bo comunidad y pais ta bay dilanti.
“Educa ta encera tambe pa bo sa ki responsabilidad bo tin como persona y sa kico tur mi por haci pa bay dilanti y pa yuda mi mes”, segun Illidge.
