Glenda Hernandez: --- ORANJESTAD (AAN): Departamento di Asuntonan Social (DAS) a tene un conferencia di prensa Diamars, relaciona cu Dia Internacional di Trabao Social cu ta 15 di Maart.
Durante e conferencia di prensa director Glenda Hernandez a trece dilanti cu trabao social den nos sociedad y den tur sociedad na mundo ta un trabao hopi indispensabel cu mester wordo haci.
“Bo ta nota solamente su falta ora cu e no sosode”.
Trabao social ta interconecta cu trabao riba tereno mental, riba tereno fisico, pues pa bo ‘social wellbeing’ bo mester ta bon riba e diferente terenonan ey, segun Hernandez, kende a sigui bisa cu esey ta algo cu den pasado Aruba no a duna suficiente atencion na dje, esta na tur e aspectonan menciona.
El a sigui bisa cu bienestar social, bienestar mental y bienestar fisico ta aspectonan hopi esencial den bida di un famia y di un persona.
Hernandez a probecha di e oportunidad pa felicita tur trahador di Sociale Zaken y tur trahador riba e tereno social cu nan dia.
“Nos ta hopi contento cu e trabao cu nan ta desplega”.
E no ta facil , pasobra e problematica ta hopi grandi actualmente y e trabaonan ta sigui toch.
Nos ta haci nos esfuerzonan, unda cu entre otro nos ta bishitando casnan di famia y nos ta yuda nan den diferente proyecto di Sociale Zaken, segun e director di DAS.
