Reaccionnan ta mustra --- ORANJESTAD (AAN): Un avalancha di critica, observacion, y keho a plama tur caminda Dialuna anochi, despues cu Polis y tambe Taskforce di DVG a bay stop baliamento dilanti e establecimento di Djiepie’s Place den Caya Betico Croes na Playa.
Y mayoria di e reclamonan tabata dirigi riba e pensamento, cu autoridadnan na Aruba ta midi cu dos midi diferente, pasobra mesun momento tabata skeiro imagen di otro lugarnan na Palm Beach cu hopi baliamento parti paden. Anto net na Djiespie’s unda tin principalmente hendenan di edad grandi ta balia cu nan mesun pareha, ey a bin tene un accion, a stop tur cos, y muy probablemente gerencia lo haya un procesverbaal.
E disgusto cu a reina tabata enorme. Pasobra djis e poco chens cu nos hendenan di edad a haya pa por diverti e anochi prome cu Dia di Betico, a wordo paraliza abruptamente, y hendenan no ta di acuerdo cu esey.
Hendenan tabatin nan tapaboca, y ta baliando cu nan mesun pareha. Ademas, e pensamento ta cu e casonan activo ta bahando, y net e grupo di esnan di edad cu semper ta hopi mas cauteloso, lo no bay ocasiona un ‘super spreader event’ na Djiespie’s Place.
Ademas, di antemano caba tabata sa cu e actividad aki a wordo poni riba schedule. Pues autoridad por a hala atencion di gerencia di antemano pa bisa nan cu esaki no ta aceptable. Pues e compania a haci gasto innecesario pa colmo anto.
Entre esnan cu tabata presente, por a mira varios palanca di Partido MEP cu no a gusta nada di loke a pasa e anochi aki. Y por spera cu e resto di siman lo por sigui tende comentario di tur esaki.
