ORANJESTAD (AAN): Un acto cu hopi hende ta haya bergonzoso, inaceptable, y desmotivador pa hopi hoben presente, a socede recien na e veld di futbol di Centro di Bario Dakota.
Un diferencia di opinion entre un persona, y un coach para banda di veld ta dirigi e hobennan den e wega di futbol, diripiente a bira mas tenso ora cu un di e persona hostina y furioso a cuminza cana yega cerca e coach.
Esaki a escala aun mas, ora cu diripiente palabranan di insulto a cay anto cu voz grandi, siendo cu tin cantidad di hoben y mucha chikito bao di dak.
Un video cu a circula den fin di siman, a mustra cu no obstante insultonan fuerte aki, e coach a mantene su mes trankil y a dicidi haci loke ley na Aruba ta sugeri pa tur hende tuma ora cu tin conflicto, esta di bira y cana bay.
Un dama a core yega cerca cerca e persona hostina y a logra convence pa aleha di e veld. Pero toch e insultonan a sigui siendo cu el a yega bek den area di tribuna.
Esnan cu a mira e video aki, ta lamenta cu esey ta socede den competencianan di futbol hubenil. Pasobra ultimo tempo, deporte di futbol na Aruba a crece significantemente, y lidernan ta atende awor hasta muchanan di edad di 4 aña den e competencianan organiza aki.
E comportacion asina di e persona masculino riba e video, a wordo categoriza door di varios persona como un ‘actitud desmotivador’. Na otro paisnan, nan lo a hasta sugeri pa hendenan cu ta rabia liher, pa atende curso di ‘anger management’.
E lema di Nacionnan Uni su comision di Droga y Crimen ta bisa: “Deporte ta yuda hobennan keda leu di crimen”. Ban yuda nan keda leu tambe di friccion asina pisa tambe.
