ORANJESTAD (AAN): E ta un lugar unda den pasado decenas di adicto Arubiano a wordo manda pa asina yuda nan sali di e vicio di drogadiccion.
Recientemente a tuma nota cu Hogar Crea ta keto bay den operacion, desde cu el a wordo funda na 1975, via decreto di president, y operando regula bao di ley pa preveni, rehabilita, y stop personanan di sigui cu uso di droga of otro adiccion.
Nan a caba di honra 465 hoben Dominicano kendenan a cay den e mundo scur di consumo di droga. E hobennan a ricibi un certificado cu ta acredita nan como ‘Re-educa’, “libera di e ambiente traicionero ey”, y esaki nan a ricibi den presencia di autoridadnan hudicial, militar, legislativo, y municipal den un acto cu a ser haci na sector Alma Rosa di Santo Domingo Este.
E programa di re-educacion cu Hogar Crea Dominicano tin como meta, ta pa logra cu e hobennan adicto por drenta bek den sociedad, convirtiendo nan mes den hendenan util y productivo.
