ORANJESTAD (AAN): E siman aki, prensa na Venezuela a publica un relato di un hoben di 23 aña, kende a haye obliga na bandona su pais pa prome biaha,
enbusca di un forma pa por yuda su famia. E constante hamber, y e hecho cu casi no tin oportunidad mes, y constante fayo di servicio publico na estado Falcon, a pone tuma decision pa subi un boto pa move rumbo pa Aruba, unda e tabatin speranza di haya un trabao pa asina manda placa pa su casa y dos yiu muher.
E relato publica pa e periodista Irene Revilla riba e plataforma di El Pitazo, a splica con e hoben di fam Carrasquero di 23 aña tabata mira Aruba den dia for di Cabo San Roman, y anochi tabata mira e luznan briyante. Su anhelo pa bay emigra pa traha na Aruba, ta djis pa duna un mihor futuro na su casa y dos yiu muher.
E hoben a nace na Charaima, cu ta un pueblo na peninsula di Paraguana, djis 50 minuut leu di Cabo San Roman. E tabata mira Aruba asina cerca ora e ta pisca anochi, y asina el a imagina un futuro na e isla aki. Asina el a tuma e decision pa subi un boto y trata di drenta ilegal na e isla Hulandes.
El a haye obliga na bende su motorcycle, como cu esey ta unico obheto di balor cu e tabatin. Asina el a paga pa e viahe cu tabata poni pa luna di Januari 2021, pero na final el a sali te dia 15 di April. Asina nan a nabega e 36,7 kilometer for di Paraguana bay nort.
E hoben no a yega ni pone pia drechi na Aruba, pasobra autoridad a gara nan. E boto cu tabatin 17 hende ilegal riba dje, a wordo detecta pa Guardacosta di Caribe Hulandes, y aunke e hendenan a bula bay den lama, toch nan a keda deteni.
“Miedo a garami. Mi a corda riba mi yiunan, riba mi casa, tabata manera un pelicula di teror cu ta pasando den mi cabez den slow-motion. Nan a garami. Mi a sinti cu mi futuro a evapora, mi a sinti cu mi a decepciona nan,” el a bisa den entrevista.
El a bisa cu autoridadnan a trata nan comosifuera nan ta delincuente, y a hiba nan den celnan cu otro personanan cu tabata wardando pa wordo deporta bek, aunke el a bisa cu nan tabata den mesun cel cu presonan cu ta deteni pa delitonan comun.
Mayoria di esnan deteni ta Venezolano cu a yega e isla den boto chikito, y a impone riba nan tur un prohibicion pa no drenta Aruba pa 10 aña largo.
PAREHA A YUDE:
Ora cu e tabata deteni, e preocupacion di mas grandi di Carrasquero tabata con pa avisa su casa na Venezuela? El a logra cera amistad cu un famia naci na Aruba cu tabata bishita un preso cu ta deteni pa ladronicia. Carrasquero a pidi nan e fabor si nan por comunica cu su casa, y eynan el a cuminza yora.
“Mi no por imagina kico nan lo ta comiendo. Na cas semper nan ta come e pisca cu mi ta bay gara tur dia. Ya caba tres dia a pasa y mi no por a comunica cu nan na Charaima. Mi a yora manera un baby, y esey a dunami hopi desesperacion,” ta loke Carrasquero ta corda awor.
E pareha di Aruba a logra comunica cu e casa di Carrasquero na estado Falcon, y a nan no a djis informe cu e ta deteni, sino cu ora nan a haya sa di su storia pakico el a purba drenta Aruba via boto, nan a mustra empatia y a cuminza acumula paña, co’i hunga, y zapato pa e famia di e hoben deteni. E articulonan aki e por a hiba den un maleta ora cu Carrasquero a wordo deporta cu avion, dia 8 di Mei 2021.
E famia di Aruba a paga tambe pa comestible pa e famia cu a keda na Charaima, via di un tienda online.
“Tabata hopi loke e famia di Aruba a haci pa mi famia, y pa esey semper mi lo ta agradecido. Ora mi a yega Aeropuerto di Maiquetia, e personal di inmigracion y e militarnan a trata nos manera ‘vendepatrias’, di traidor... esey ta facil pa bise cu barica yen. Awor mi ta bek na mi pueblo, sin brommer, sin por a logra traha na Aruba,” el a bisa decepciona.
Carrasquero ta un bachelor, e no a drenta Universidad pasobra no tabatin e chens di sali di pueblo, y pesey el a dicidi na djis gana su placa cu piscamento, y esaki ta algo cu el a cuminza haci bek atrobe. EL a bisa cu e no a perde speranza cu un dia e lo logra su soño di bay biba y taha na e isla cu e ta sigui mira tur anochi ta briya for di su cas.
- Cu informacion di El Pitazo.
