Expertonan cu no por distingui entre Zuid y Noord ta abunda --- *Seriedad y responsabilidad ta central pa atende cu naturalesa
ORANJESTAD (AAN) — Prome cu condicionnan di tempo a haci nan entrada den mundo di periodismo den nos region na añanan setenta di siglo 20, Aruba tabata prepara su mes pa temporada di horcan, cu tabata wordo considera e “temporada cortico” di yobida despues di San Juan.
Piscadonan den e temporada aki tabata keda alerta pa condicionnan di biento y lama, cu tabata duna nan e señal cu fenomenonan asocia cu tempo di horcan, tabata na caminda.
Campo mester di yobida pa produci y poznan tambe tabata tin mester di awa. Di otro banda e peliger di tempestad pa viviendanan tambe tabata wordo reconoce.
Den construccion di viviendanan di Aruba ta nota e forma con tabata evita pa biento bay cu daknan y daño wordo haci na hende y nan vivienda.
Hende a biba cu naturalesa cu seriedad y responsabilidad te na momento cu mundo a cuminsa yena cu inteligencia moderno.
Satelite a drenta espacio y a cuminsa manda imagennan di condicionnan di tempo pa mundo.
Aruba, cu tabata considera dia di un bon yobida como dia di alegria y fiesta pero tambe tabata reconoce e forsa di naturalesa, tambe a conoce introduccion di informacion regular di tempo, cu a bira parti di periodismo moderno.
E forma cu paisnan manera Hulanda tabata trece noticia di tempo, a bira base pa informacion di condicionnan di tempo, mientras Servicio Meteorologico di Antia, di cual Aruba tabata forma parti, a conoce desaroyo rapido.
Tabata scucha e informacion di expertonan riba tereno di meteorologia, te na momento cu computer a haci hende experto riba tur tereno.
Aki ta caminda problema a haya su origen.
Diripiente, for di momento cu biento supla duro for di inicio di Juni, caya ta yena cu pronostico di tempo.
Hende cu no por a distingui entre Noord y Zuid, a cuminsa ta discuti cu Servicio Meteorologico riba condicion di tempo.
E hecho cu Aruba ta situa den e zona conoci como santana di horcan, a haci cu hasta bofon tabata wordo haci di expertonan ora Aruba scapa di un horcan, cu na otro pais a mata hende.
Hende a bira e peliger mas grandi den temporada di horcan, pasobra tur hende a bira experto riba tereno di horcan.
E resultado? Cuanto hende ta prepara pa temporada di horcan, cu no mester di un horcan pa causa desastre na Aruba, sigur awor cu careteranan ta bira piscina na momento di yobida?
Tur hende ta papia di cambio di clima. Lama a bira mas cayente. Pero con nos ta prepara nos mes pa un lama mas cayente?
Soluciona e problema no ta facil, ya cu tin otro grupo di experto, cu ta cuminsa grita horcan for di momento cu na Africa nan registra un biento fuerte.
Temporada di horcan 2022 a cuminsa cu varios sistema den nos region, di cual uno ta bou vigilancia di National Hurricane Center di Merca, e instancia den cual e region di Caribe tambe ta uni.
E region ta ricibi un prome advertencia cu nos ta den temporada di horcan, cu ta exigi pa nos prepara pa e tempo cortico di yobida, manera semper e Arubiano a haci.
E Arubiano cu a biba cu realidad di naturalesa y asina a haci naturalesa productor di su cuminda; di awa pa yena su tankinan y damnan pero a reconoce tambe e forsa di naturalesa pa cual nos mester ta prepara.
Tempo a duna hende hermentnan importante pa enfrenta peliger natural. Ta keda na hende pa dicidi si e kier demostra di ta inteligente den temporada di horcan of si e ta keda e problema di mas grandi ora bati alarma pa peliger.
