Hacking na compania di electricidad na St. Maarten awor a bira asunto di ‘Seguridad Nacional’

PHILIPSBURG: E siman aki, Parlamentario Ludmila de Weever a bati alarma, pa mustra cu e eterno silencio cu nan ta hayando for di e compania di electricidad NV GEBE, ta hopi preocupante.  Pesey el a pidi un reunion urgente di Parlamento.

   E peticion pa e reunion aki a wordo sosteni tambe pa Parlamentarionan Christophe Emmanuel, Melissa Gumbs, y Sarah Wescott-Williams.

   “E por ta un señal cu NV GEBE a bira un asunto di Seguridad Nacional,” ta loke Parlamentario De Weever a adverti.  “Nos ta yegando e di seis luna desde cu e compania NV GEBE a bira victima di atake cibernetico y cu nan a perde tur informacion y data,” el a bisa.

   Mientras tanto, e Parlamentario ta sigui di ta firme den su pensamento cu GEBE no ta bisando tur e berdad, pasobra e realidad por ta cu nan a perde henter nan sistema!  Pues kizas informacion di creditornan, informacion di esnan cu debe, y hasta e layout di e red di distribucion di coriente rond di e isla.

   “Te dia di awe, clientenan ainda ta wardando riba nan cobranza, pasobra e ultimo cu nan a haya a wordo saca sea na Februari of Maart 2022.  Te cu awor, e clientenan sin cobranza ta sigui bisa cu nan no ta comfortable ta paga un suma fiho via online banking.  Te awe, e sistema di administracion financiero definitivamente no a wordo recupera cu 75%,” Parlamentario De Weever a bisa enfaticamente.

   “Unda e garantia tey cu e informacion di tur cliente ta den nan sistema, siendo cu hopi bario no a haya ni un cobranza ainda?  Djis puntra e habitantenan y mesora lo bo tende di nan,” De Weever a sigui bisa.

   Un di e caracteristicanan di un comunidad chikito manera St. Maarten, ta cu tur hende conoce otro, y hende ta papia!  “E rumornan cu wholesalers a bisa cu nan lo no duna credito mas na NV GEBE awor ta bon conoci,” De Weever a agrega.  “Esaki ta ponemi pensa cu si acaso NV GEBE no por paga esnan cu ta suministra servicio, e ora nan por paga nan empleadonan?  Si ta asina, pa cuanto tempo?  Sin e salbabida financiero aki pa e compania y empleadonan, pa garantiza cu nan lo keda mantene luz cendi ta parce di ta imposible,” De Weever a conclui.

   Y si bo mira e carera di Parlamentario De Weever, bo por compronde di con e tin asina hopi preocupacion!  Den pasado el a forma parti di un team di Audit Financiero externo di PriceWaterhouseCoopers St. Maarten di 2010 te cu 2014.  Tambe di aña 2015 pa 2017 el a sigui perfecciona su conocemento riba empresanan di utilidad publico, ora cu el a traha como parti di e team di Audit Financiero di WEB Bonaire, cu PwC Curaçao,  Te ora cu el a acepta su nombramento como Ministro di Turismo y Asuntonan Economico, Parlamentario De Weever a traha como Consehero di Business Analysis di NV GEBE.