ORANJESTAD (AAN): E siman aki den oranan di anochi, Rescue & Coordination Center (ROC) di Guardacosta di Caribe Hulandes, a haya un suplica pa presta asistencia na un boto cu a confronta problema cu motor.
E boto ‘Sylvan’ cu matricula NC274 tabata e momento ey riba lama na altura di Cas Abou na Curacao. Mesora Guardacosta a saca un speedboat special tipo Metal Shark pa e area.
Ora cu nan a yega, a bin nota cu tur hende abordo ta den bon condicion di salud, y sin problema. Tur hende tabatin nan salbabida bisti.
E Metal Shark a rek un cabuya pa nan, y asina a lastra e boto rumbo pa Draaibooi baai pa asina nan yega tera bek.
