ORANJESTAD (AAN): Evelyn Wever-Croes den su posicion di Formador di Gobierno, diahuebs atardi a duna un actualisacion riba e proceso di formacion.
El a indica cu den e dianan aki a continua cu e trabaonan di formacion y pa esaki a reuni cu diferente stakeholder. Pero e proceso aki lo continua ya cu falta hopi partido ainda pa sinta hunto, Wever-Croes a bisa.
E proceso di formacion aki el a parti den tres parti:
- E prome parti ta pa yega na un acuerdo di gobernacion den lineanan grandi. Esaki ta den un fase hopi avansa y pa por finalisa esaki ta reuniendo cu diferente stakeholder pa scucha nan puntonan cu nan kier aderesa na e gobierno nobo pa incorpora nan den e acuerdo aki.
- E di dos parti ta e deliberacion riba con ta bay reparti e carteranan entre RAIZ y MEP. Riba esaki a cuminsa papia di dje pero no ta cla ainda. Pero den e proceso aki lo propone candidatonan pa minister pa RAIZ y pa MEP y lo bay over na e proceso di screening. Esaki lo tuma su tempo, segun e mandatario.
- Aworaki ta meymey den e proceso di formacion y ta bayendo hopi bon. No ta premira cu ta bay tin problemanan entre e partidonan den coalicion, esta MEP y RAIZ pa loke ta e acuerdo di gobernacion, of pa e particion di e carteranan ni riba otro aspecto, Evelyn Wever-Croes a duna di conoce.
Pa finalisa e tema aki, el a lamenta e atakenan recien cu a wordo lansa contra entre otro Ministerio Publico di parti di e opositornan politico.
"Na momento cu nos mes cuminsa ataca institutonan asina, tilda nan di ta partidista, nos ta haci hopi daño na e fundeshi di nos pais", Premier Wever-Croes a expresa.
