Grupo Tiki Tin a celebra 80 aña di Maria Gei, un dama hopi activo y modelo pa hopi adulto mayor  

Frances Figaroa a relata:

ORANJESTAD (AAN)—Señora Frances Figaroa, di Grupo Tiki Tin, clasico di Noord, a relata den un entrevista cu DIARIO, cu nan ta un grupo cu ta cay bao Fundacion Movimento ta Bida, y cu e grupo ta consisti di hopi adulto mayor (femenino), di tur distrito di Aruba.

Nan a celebra e siman aki, hunto cu señora Maria Gei, su di 80 aña di existencia, cu el a cumpli dia 22 di October, pero e grupo no por a celebr’e riba e fecha aki. Sinembargo e siguiente siman, hunto tur miembro di e grupo, nan a celebra e dia special y grandi aki, di Maria Gei su cumpleaño.

Frances a expresa cu 80 aña ta un edad hopi halto, pa un adulto cu ta motiva, activo y cu ta keda move.

“Maria ta un persona cu a haya un kib            ranto di salud pa algun luna, di cual el a recupera y a bolbe cerca nos. E no kier a stop. Maria ta e pionero di e grupo mas bieu cu ta cay bao responsabilidad di Movimento ta Bida. Na September, nos a cumpli 13 aña di existencia, y Maria desde comienzo ta cu nos”, señora Figaroa a menciona.

            El splica cu e grupo ta consisti di 25 persona, y lastima cu e dia aki, algun a falta pasobra nan tin un malesa y ta den exterior pa tratamento, y e dama a desea nan den nomber di e grupo, hopi forza y salud, pa pronto nan ta hunto den nan grupo.

            El a expresa cu Maria ta un modelo pa e adultonan mayor cu ta na cas sinta, warda pa e dia pasa y ta bira desespera, haya stress, y cu no ta mira famianan, tin biaha pa dianan largo.

“Esey ta hopi lamentabel. Nos ta bisa cu nos tin cu corda cu nos grandinan ta e fundeshi di nos comunidad. Si no ta pa nos grandinan nos hobennan awe por lubida, pasobra ta nan a pone e fundeshi fuerte, y Maria ta un di nan. Mi tin cu bisa si, ta lastima cu nos grupo ta consisti solamente di hende muher, pero nos kier mira nos cabayeronan tambe, pa nan bira mas activo y move hunto cu nos. Nos ta yama nan welcome, bon bini, pero nos no ta mira nan.

Nos ta purba, pero nos no ta logra. Mi ta bisa cu adulto mayor, homber y muher tur dos tin cu traha riba nan calidad di bida y nan mester keda activo y keda move”, señora Frances Figaroa a señala.