Grupo Scout Ora Ubao ta celebra 39 aña di compromiso cu comunidad

ORANJESTAD (AAN): Awe 26 di maart, Grupo Scout Ora Ubao ta celebra 39 aña di existencia y servicio na mucha y hobennan di nos comunidad.

Den conexion cu e fecha importante aki, siman pasa diasabra nan a organisa un encuentro special na Centro di Campamento Scouting Aruba (SKA). 

Durante e actividad, e hobennan y e mayornan presente a wordo parti den grupo y a participa activamente den diferente post di wega, fomentando trabao den ekipo, liderazgo y disciplina, cualnan ta balornan fundamental den scout. Tawata un dia cu dushi ambiente y union. Riba e dia aki tambe a instala 4 hoben den e categoria welp. 

Lider di grupo, Edmira Christiaans, a expresa su sincero gradecimiento na tur lider cu, durante casi cuater decada, a dedica nan tempo liber y energia pa forma hobennan cu caracter y responsabilidad. El a gradici tambe e mayornan pa e confiansa cu nan a deposita den e organisacion, cu ta un factor importante pa exito y sostenibilidad di grupo scout. 

Cu bista riba futuro, Grupo Scout Ora Ubao ya ta trahando riba nan plannan pa celebra nan 40 aniversario otro aña. E organisacion ta haci un yamada na tur esnan cu tin interes di contribui como lider, pa tuma contact cu nan via nan pagina oficial di Facebook. 

Casi cuarenta aña despues di su fundacion, Grupo Scout Ora Ubao ta sigui firme den su mision: forma hobennan cu balor, vision y compromiso. Formando asina un legado cu ta sigui crece cu cada generacion.