Grupo nobo di mucha homber a inicia Proyecto Formacion Social

Jessy Ras hopi contento pa e interes:

ORANJESTAD (AAN) – E siman aki a habri cu un grupo nobo di mucha homber, esta grupo 17, pa participa den e Proyecto SVT.

Jessy Ras, Coordinador di e  Proyecto Formacion Social (SVT) a comenta en entrevista cu DIARIO, cu ta trata aki un grupo di 20 hoben, cu a pasa den henter e proceso di seleccion y a drenta Kazerne.

Nan a cuminza e trayecto cu e parti traha riba nan mes. Jessy ta hopi contento con e parti di seleccion a bay, y cu e cantidad di hoben cu a inicia e trayecto. El a comenta cu e biaha aki a haya mas cu 30 inscripcion pero tin cu a cay afo.

Pero e interes tabata hopi halto y e hecho cu a baha edad minimo pa 17 aña ta un factor, y den e grupo aki tin hopi cu ta asina jong.

Actualmente tin dos grupo ta andando. SVT 16 cu ta bay finaliza e trayecto. Nan a cuminza na Maart 2023 y e siman aki nan rond af henter e trayecto y haya nan certificado tambe. E grupo aki a bay hopi bon, y tin cu a haya trabao pa ora nan termina cu e trayecto.

E grupo 2 di damas, cu a cuminza na Augustus, tambe ta bayendo bien, y nan a cuminza cu e parti di stage. Jessy Ras ta contento con e aña a habri pa SVT.

Ras a comenta cu e parti bunita ta cu e hobennan aki a drenta hopi motiva di propio iniciativa, y no a wordo forza sino. Algun a haya motivacion di otro hobennan cu a pasa den e trayecto caba y cu ta bisa cu e experiencia aki ta bon y nan mes ta haci promocion pa otronan drenta SVT.