Grupo di hoben ta cla pa yuda hobennan hunto cu profesionalnan

ORANJESTAD (AAN)- Diasabra ultimo tabata tin un dia di encuentro cu hobennan, pa asina cera conoci cu un grupo di hoben mucha muher Every Minds Matters cu ta cla pa yuda nan hunto cu profesionalnan.

Segun e lider di e grupo Cindy Jansen, nan a organiza e evento aki hunto cu Cede Aruba, y e meta principal di e proyecto aki ta pa crea un support group pa hobennan entre 14 pa 20 aña. E mainta aki e 9 hobennan cu ta forma e grupo Every Minds Matter a habri e mainta cada un cu un bunita mensahe na e hobennan bishitante. Alysha “Trankilidad ta loke nos ta ofrece na esnan cu mas tin necesidad di ta sigur den bida”.

Shanyla “Sinti e alegria ora cu bo sa cu bo curazon y mente ta liber di tur negatividad”.

Rochaline “Permiti mi saca e alegria di bo curazon y yena bo cu felicidad y seguridad”.

Ileyna “Tuma mi man di amiga, acepta mi presencia y sa cu mi tey pa combersa y no huzga”.

Brigitte “Nos no ta  pone ningun barera pa niun hende, sa cu nos ta habri braza pa scucha y conseha”.

Christy “Medita, relaha, abo no permiti pa bo paz wordo kita”.

Shany “Mi tey pa seca tur lagrima, comberti bo scuridad den claridad y laga un sonrisa riba bo cara”.

Cindy “Nos ta aki awe pa laga bo inseguridad comberti den bo seguridad. E paso firme cu bo tin cu tuma pa ta mas feliz pa bo mes y pa esnan cu bo ta stima”.

Na e mainta aki tambe tabata tin presente Johnny Boekhoudt y Myrene Croes Psicologo, testimonio di Janiro Eisden y Eunice Albertsz.

Cindy a bisa cu e proyecto aki ta di 3 pa 4 luna caminda tur hobennan interesa ta bay sinta hunto, ta papia y lo bay tin diferente actividad pa nan y na final ta evalua con nan a cuminza y con nan a caba.

Pa hobennan interesa por yama Cindy na 5668813 of por manda mensahe riba nan facebook page Every Mind Matters.