Groundbreaking di proyecto Animal Welfare Center pa bienestar di animalnan

Ministro Ursell Arends ta haye un progreso importante

ORANJESTAD (AAN): Minister Ursell Arends ta anuncia desaroyo importante den cuadro di e vision pa bienestar di animal na Aruba. Groundbreaking di e prome Animal Welfare Center ta un realidad. 

   Ministerio di Naturalesa a bin ta traha duro ariba diferente proyecto y cambionan structural cu ta enfoca riba proteccion y bienestar di nos animalnan domestico. Un di e prome pasonan cu a worde tuma den e cuadro aki ta pa drecha e relacion cu  fundacionnan y stakeholders importante cu ta traha den e arena di bienestar di animal.

   A haci un sondeo y a sinta cu stakeholders pa identifica retonan y problematicanan cu ta existi pa asina determina kico ta e desaroyonan y cambionan importante cu tin mester pa berdaderamente garantisa bienestar di animal. E resultado ta e maneho - MBAA (Maneho di Bienestar di Animal Aruba), cu ta enfoca specificamente riba bienestar di animalnan en general pa Aruba. Den e maneho di Minister Arends e aspectonan importante ta worde cubri pa loke ta a corto y a largo plaso cu mester tuma luga den proximo 5 añanan.

   Un Ley Nobo pa Proteccion di Animalnan Domestico. Den cuadro di e progreso na bienestar di nos animalnan a traha ariba e ley nobo: Landsverordering Dierenwelzijn. E ley aki ta enfoca principalmente riba proteccion di nos animalnan domestico pa garantisa cu nan ta haya e cuido y proteccion necesario. E diferencia grandi entre e ley nobo aki, cu esun existente ta cu den e ley nobo ta enfoca ariba aspectonan importante pa cu doñonan di mascota y otro animalnan domestico. Esaki ta inclui aspectonan manera; microchipping y registracion obligatorio, sterilisacion obligatorio y tambe registracion pa breeders. A enfoca tambe pa drecha e forma cu e ley ta worde enforsa. E ley nobo por worde enforsa den e forma “bestuursrechtelijk” caminda un departamento specificio lo haya e autoridad pa pone consecuencianan ariba actonan cu ta contra e ley, sin cu esaki mester bay OM pa worde procesa. Den e cuadro aki Minister Arends ta sumamente contento di ta yegando den e fase final di completa e ley pa asina e sigui cana su trayecto legal pa worde implementa oficialmente.  

   Animal Welfare Center (AWC) ta un centro pa acomodacion, cuido y rehabilitacion di cacho, pushi y otro animalnan domestico. Ademas, e lo fungi como un centro di recurso pa nos comunidad pa busca informacion, ayudo y servicionan medico pa nan mascotanan of otro animalnan domestico.

   Un centro pa acomoda animalnan cu ta worde recogi for di caya of confisca pa casonan di maltrato. Den e centro aki lo tin haulanan special pa acomoda un total di 60 cacho y 40 pushi. Asina nan lo ricibi cuido, rehabilitacion y tambe pasa pa adopcion pa sigura cu tur animal ta haya un segundo oportunidad na bida. Alavez lo bay tin un departamento di cuarentena pa animalnan cu ta drenta ilegalmente na Aruba y tambe un clinica pa por duna servicionan medico na nos animalnan.  

   E construccion di AWC lo inicia desde 15 di november2024, y lo habri su portanan oficialmente na final di 2025. Esaki lo simbolisa un paso gigantesco pa bienestar di animalnan na Aruba y pa nos comunidad.