Gobierno ta reafirma importancia di sigui ley y proceduranan di ordenacion teritorial

ORANJESTAD (AAN): Gobierno di Aruba kier enfatisa e importancia di cumpli cu ley,

reglanan y proceduranan prescribi pa planificacion espacial responsabel y proteccion di e recursonan limita di tereno y naturalesa cu nos isla tin.

Aruba tin reglanan specifico y cla pa desaroyo teritorial estableci den e “Ruimtelijk Ontwikkelingsplan met Voorschriften” (ROPV), cu ta determina e procedura cu tin cu sigui pa actividadnan cu ta inclui rosamento, modifica of desaroya tereno. E proceduranan aki ta existi pa garantisa cu tur actividad ta tuma luga di un manera transparente y balansa, cu ta tene debido cuenta cu interes publico, crecemento economico, proteccion ambiental y uzo sostenibel di e espacio limita riba nos isla.

Conforme cu e reglanan vigente, actividadnan di limpieza di tereno (‘rosamento’) ta rekeri un “aanlegvergunning” prome cu cualkier trabou fisico por cuminsa. Como parti di e proceso aki, instancianan tecnico, DIP y DNM, ta evalua si tin areanan ambiental of structuranan hidrologico presente riba e tereno. Esaki ta inclui consideracion di structuranan ecologico manera rooinan, flora y fauna protegi y otro caracteristicanan cu merece proteccion. Solamente despues cu e procedura legalmente rekeri wordo completa, por considera otro permisonan necesario, incluyendo un permiso pa construccion.

Gobierno ta na altura cu tanto den presente como den pasado a surgi situacionnan unda tereno a wordo rosa ilegalmente sin obtene e permiso rekeri prome. Tambe tabata tin casonan cu e condicionnan stipula den un permiso no ta wordo sigui debidamente of unda tereno ta wordo rosa cu e meta di crea un situacion pa solicita (despues) directamente pa e permiso di construccion y asina efectivamente ‘desvia’ di e procedura legal pa pidi e “aanlegvergunning” rekeri. Tur e practicanan aki ta completamente ilegal y contrario na e proposito y aplicacion di ley y reglanan di Aruba.

Gobierno di Aruba kier expresa den forma cla cu e ta desaproba completamente tur accion cu ta ignora e proceduranan legal estableci pa desaroyo di tereno. Cumplimento cu e proceduranan aki no ta opcional. Nan ta reglanan cu tur hende mester cumpli cun’e! E reglanan y proceduranan ta existi pa proteha interes publico y garantisa cu decisionnan tocante uzo di tereno ta wordo tuma di manera transparente, consistente y basa riba evaluacionnan tecnico y ambiental relevante.

Nos ta reconoce cu e leynan actual no semper ta contene instrumentonan suficientemente efectivo pa sanciona practicanan ilegal. Pa e motibo aki a cuminsa cu e proceso pa fortalece cumplimento, supervision y aplicacion debido di leynan. Esaki ta forma parti di e agenda di “reconstruccion” di Gobierno di Aruba. E ta inclui un proceso di evaluacion y mehoracion di e instrumentonan disponibel pa garantisa mas respet pa y cumplimento estricto cu e reglanan di planificacion espacial y proteccion ambiental.

Como un isla chikito cu espacio limita y cu areanan natural cada biaha mas scars, Aruba no por permiti pa perde areanan natural, sistemanan ecologico y patrimonio natural door di accionnan cu ta simplemente evita e proceduranan legal estableci. Proteha nos medio ambiente no ta solamente un responsabilidad ambiental; e ta un inversion den bienestar, resiliencia y futuro prosperidad di nos comunidad.

Gobierno ta haci un yamada na tur propietario di tereno, esnan encarga cu desaroyo di proyectonan di construccion, contratistanan y otro actornan relevante, pa tene nan mes strictamente na e proceduranan legal aplicabel pa tur forma di construccion. Trahanado hunto nos por sigura un desaroyo balansa di nos isla cu ta sosode di acuerdo cu nos reglanan y uno cu ta responsabel y sostenibel.