Gobierno lo sigui cu e iniciativanan pa baha e tarifa di awa y coriente

Prome Minister a reuni cu Minister Rob Jetten

ORANJESTAD (AAN): Diamars atardi, Prome Minister Evelyn Wever-Croes a reuni cu Minister Rob Jetten, cu ta encarga cu e cartera di clima y energia na Hulanda. Durante e reunion a toca varios tema importante relaciona cu e topico aki, di cual un sigur tabata e conferencia di clima y energia cu Aruba y Hulanda a organisa aña pasa na Aruba.

                Pa cu e aña aki, Prome Minister a indica cu nan lo organisa e conferencia aki un biaha mas, y unabes cu nan tin e contenido y pais anfitrion cla, lo anuncia esaki.

                Un otro tema di importancia cu nan a pasa riba dje ta e disponibilidad di fondo financiero cu tin na Hulanda, cu Aruba lo por uza pa e proceso di transicion di energia. E meta di esaki ta pa evita cu Aruba ta asina dependiente riba "heavy fuel oil", y traha mas cu energia limpi, mirando cu esaki lo yuda na baha e tarifa di awa y coriente pa e comunidad di Aruba.

                Prome Minister a expresa cu Minister Jetten ta sostene e iniciativanan cu e diferente islanan den Caribe ta tumando, y ta para hopi pa traha hunto, y aki ta unda Aruba como isla lo mester wak di ki manera lo por traha hunto pa yega na solucionnan concreto.

                "E reunion a bay den bon ambiente, y ohala cu pronto Aruba lo por anuncia e pasonan concreto cu Gobierno lo tuma pa logra na baha e tarifa di awa y coriente pa comunidad", Prome Minister a expresa.