Gobierno a pone 33 miyon florin disponibel pa aña 2024 y 105 miyon pa aña 2025

Pa mas di 33 mil hende haya un aumento di entrada,

ORANJESTAD (AAN): Prome Minister Evelyn Wever-Croes a indica durante e Conferencia di Prensa di Gobierno di Aruba siman pasa cu ya pa mas di un aña, Gobierno di Aruba ta indicando riba e importancia di pone finansas publico di Aruba na orden pa asina por crea espacio financiero y pa cuminsa duna alivio financiero na comunidad.

            Prome Minister a declara cu awor Aruba ta bibando un bon momento y ta progresando y pa di dos biaha consecutivo tin un surplus den e presupuesto. Tur esaki ta haci cu awor Gobierno por a cuminsa duna bek na e ciudadanonan y ta bin haciendo esaki desde luna di juli. 

33.000 persona den comunidad a haya aumento

            Prome Minister a indica cu un total 33.000 persona a haya un aumento di entrada; E empleado publico y di DPS a haya e prome parti di nan merecido indexering. Tambe a subi e reparatietoeslag di pensionadonan di SVB y empleadonan di sector priva cu ta gana un salario te 2500fl. Y tambe esnan cu ta haya gehandicapten uitkering y trahadonan di fundacion a haya aumento. 

Recapitulacion di e total

            “En total Gobierno di Aruba a pone disponibel 33 miyon florin pa aña 2024 y pa aña 2025 e inversion lo ta 105 miyon florin. Cu esaki mas di 33 mil hende a haya un aumento di entrada, y asina nos por duna e alivio den nan situacion financiero y yuda cada ciudadano cu e poder di compra. Nos no a realisa tur nos metanan ainda, pero nos ta logrando si”, Prome Minister a expresa.