Gobierno a lansa material educativo pa scolnan ‘Mi Mascota’

Prome Minister: "Ban crea doñonan di mascota responsabel"

ORANJESTAD (AAN): Dialuna anochi Prome Minister Evelyn Wever-Croes hunto cu Minister Endy Croes, Minister Ursell Arends y Parlamentarionan Setty Yarzagaray, Darlaine Guedez Erasmus, y Ricky Hoek tabata presente na John F Kennedy Educenter pa lansamento di material educativo "Mi Mascota". Prome Minister a splica cu e proyecto aki a inicia bou di ministerio di enseñansa, cu e meta pa traha material educativo pa e scolnan.

  E buki "Mi Mascota" a worde traha door di un ekipo di profesional, cu a sa di entrega un buki di calidad halto y di bon contenido. Prome Minister a expresa cu e material importante aki ta yen’e di hopi emocion, pasobra na Aruba e problematica di specialmente cacho riba caya ta uno cu Gobierno a bin ta lucha cu ne pa hopi aña.

   Hopi ta esnan cu ta critica Gobierno pa e cachonan riba caya, pero ta importante pa comunidad sa cu e responsabilidad no ta solamente den man di Gobierno, sino tambe di e doño di e cacho. Y e unico manera pa bringa esaki ta pa cuminsa na siña nos muchanan di jong caba e responsabilidad di tin un mascota. E material educativo aki ta yuda na crea ciudadanonan di futuro pa ta mas responsabel na momento cu tin un mascota. 

Muchanan en particular ta gusta tin un "puppy" pa hunga cu ne, pero na momento cu e cacho bira grandi, tin e tendencia di hala e cacho aki un banda y busca otro puppy. Esaki sigur no ta e manera corecto pa trata e mascotanan. P’esey e material aki ta hopi importante pa siña nan con pa trata nan mascota y e deber cu ta bin cu e mascota. 

"Mi ta felicita Minister Endy Croes y ekipo cu a haci esaki posibel. Un danki na Minister Ursell Arends pa su esfuerso den bringa e problematica aki, cu ta uno compleho y cu hopi faceta. Pa esnan cu ta gusta lesa buki, sa cu no tin nada mas dushi cu habri un buki y haya e holo di e buki specialmente si e ta nobo pasobra bo lo les’e cu hopi mas smaak. 

Mi ta sigur cu e buki aki lo duna cada un di boso e sentimento necesario pa asina hunto compromete pa ta doñonan mas responsabel di un mascota. Masha pabien y hopi exito na tur e scolnan cu lo bay uza e buki bunita aki", Prome Minister a expresa.