ORANJESTAD (AAN): Diamars atardi porfin a yega asina leu, cu Ministro di Finanzas a haci entrega di e Presupuesto 2022 pa pais Aruba.
Esaki a wordo entrega den forma digital, completamente warda riba un USB Memory Stick fini, y a ser entrega na President Edgard Vrolijk.
Durante un conferencia di prensa, Ministro Maduro a reflexiona un rato riba e cambionan principal cu ta resalta den e Presupuesto 2022 aki.
E cambionan cu a resalta den Presupuesto 2022 di Aruba, manera a indica anteriormente, tabatin un discusion caba cu a cuminza riba loke ta bira e 8 miyon Florin di gasto di personal cu ta subi. Y esaki ta pa asina e recorte di 12.6% di cual Gobierno kier compensa, y pone bek pa loke ta bira e 5% di salario. Awor tin discusion cu Hulanda riba e parti aki, pa asina por paga e 100% di salario. Pero di otro banda e ora ey tin “un entrega” cu tin di tuma lugar.
Ministro a bisa cu aki ta papiando cu Sindicatonan y Hulanda ainda pa yega na un solucion. Si acaso no por yega na solucion, claramente lo bay tin cambio cu mester wordo haci na presupuesto di pais Aruba.
Pero te cu awor, esaki ta e suma cu tin pa e subida di gasto di personal.
E gasto pa “Servicio di producto” den e presupuesto aki ta subi cu 26 miyon Florin. Esey ta pa escogencianan di maneho cu tin, y den debate publico lo bay duna mas informacion riba esaki.
Sinembargo tin tambe gasto di interest cu ta subi cu 8 miyon Florin, y esaki claramente tin di haber cu e hecho cu tin di bay financia y refinancia gastonan, y esaki ta bay trece extra gasto di interes.
Pa loke ta gasto di Subsidio, esaki ta subi cu 10 miyon Florin, y esaki tin di haber cu loke ta e pago bek pa reduci e recorte salarial.
Encuanto gasto pa Impuesto directo ta subi cu 64 miyon Florin. Impuesto indirecto ta subi cu 42 miyon Florin. Esaki tin di haber cu e mehoramento economico cu ta wordo spera den 2022.
Tambe den Inversion tin e suma di 16 miyon Florin extra den dje. Normalmente e ta 20 miyon, pero e biaha aki el a yega 36 miyon pasobra tin di bay haci trabaonan urgente na e planta di RWZI na Bubali Plas.
Pa loke ta entrada, ta premira e ora eynan, debi na mehoramento economico, cu lo bay haya 162 miyon Florin mas compara cu 2021. Gastonan tambe lo baha cu 120 miyon Florin, y esey tin di haber tambe cu e hecho cu e aña aki no ta brinda sosten financiero mas na comercio, y subsidio di salario.
Pa loke ta e necesidad financiero compara cu aña pasa, esaki lo subi cu 113 miyon. Asina e deficit financiero ta baha compara cu 2021 cu 295 miyon Florin.
