Despues cu Rusia a bari speransa di Acuerdo di Minsk for di mesa --- *Nacionnan Uni ta yama Rusia perverso y bofta den cara di Brasil --- *Prijs di azeta y oro ta adverti pa instabilidad economico y financiero
ORANJESTAD (AAN) — Mundo ta basha abou. Kico ta e resultadonan pa Aruba mientras factornan inespera a presenta na horizonte mundial ora a cuminsa papia di recuperacion economico y financiero>
E conclusion cu sin mas ta bini dilanti den un analisis continuo di sucesonan mundial, ta e Acuerdo entre Aruba y Hulanda cu den e desaroyonan nobo sigur mester wordo considera como un punto di sosten sumamente importante pa Aruba.
Ora mundo a celebra 2020 cu tur tipo di plan pa 2025, 2030, 2050, Aruba no por a pensa sikiera kico tabata na caminda.
Covid-19 a presenta. Guera contra un enemigo invisibel cu a destrui Aruba, cu a traha su plan di recuperacion cu ayudo di Reino sin ta na haltura con importante e sosten di Reino ta pa Aruba den menasa di un guera mundial.
Stabilidad mundial cada rato tabata parce mas leu ayera.
Despues cu e Presidente di Brazil a sorprende mundo cu su declaracion cu Rusia ta busca paz, ayera a cera cu e declaracion di e Secretario General di Nacionnan Uni cu Rusia ta kibra paz mundial y Rusia hasta a wordo yama perverso.
Putin a bari tur speransa di Presidente di Francia for di mesa, ora el a anuncia cu e Acuerdo di Minsk, no ta existi mas.
E declaracion di Putin realmente no tabata necesario pasobra ya el a kibra integridad di e parti Oriental di Ukraine, loke ta nifica cu el a kibra e Acuerdo di no agresion den e Acuerdo di Minsk.
Rusia ta leu. Ukraine ta leu. Un guera mundial lo wordo evita na tur costo riba tereno militar.
Pero manera nos a adverti for di prome momento, mester mira e implicacion economico, cu ayera a bira e noticia mundial.
Prijs di petroleo a sigui subi y Aruba y henter mundo por spera cu prijs di gasolin, di tur producto petrolero, di transportacion, di tur producto cu mester cumpra, ta subi barbaramente manera nos a anticipa.
E intrankilidad mundial ta afecta prijs y ta crea tensionnan severo rond mundo cu ta afecta e mercado financiero y economico mundial.
E informacionnan cu a ricibi di Banco Central di Aruba ayera ta confirma e situacion di salida di 2021 y entrada di 2022 na Aruba, cu awor mester tene cuenta cu un guera mas cu visibel riba tereno mundial militar.
E resultadonan financiero, monetario, di Aruba ta indica e impacto importante cu turismo y e prestamonan di Hulanda tabata tin pa Aruba durante 2021.
E reserva di divisa a aumenta loke ta sumamente importante pa e Florin di Aruba cu mester tene na bista den maneho financiero y economico.
Reino Hulandes a impone medidanan cu no ta facil, pero cu ta habri caminda pa un reorganisacion financiero di e pais, cu for di 2014 ta den problema financiero serio.
Awe e hecho cu Aruba ta cana na man di Hulanda, a base di palabracionnan fiho den e acuerdo cu a wordo alcansa, mester permiti Aruba hala un rosea mas trankil den un situacion mundial cu tin paisnan grandi den estado di preocupacion serio.
Putin por hala atras? Kico e pakete di medida contra Rusia lo haci cu economia mundial? Kico por spera di e aliansa financiero y economico di paisnan den nos region y Rusia?
Na 2014, Putin por a realisa su plannan di conkista di teritorio. Ayera medidanan economico pisa a wordo tuma mientras prijs di petroleo tabata subi, mercado di balor tabata cay, acuerdo di clima y tanto otro acuerdo a parce lubida.
Con mundo lo sigui cana?
E hecho cu Aruba ya a subi un caminda nobo cu asistencia Hulandes, ta duna nos e confiansa; sigur si nos tene na bista cu tabata e garantia cu Estado di Derecho di Aruba, cu un base Europeo, a habri caminda un dia pa e sector financiero offshore a florece.
