Hunto cu Monumentenfonds
ORANJESTAD (AAN): Den cuadro di e bishita oficial di Gobierno di Aruba na Hulanda, Prome Minister Mike Eman, como e titular di nos Ministerio di Cultura y su delegacion a bishita e Stadsarchief Amsterdam pa un encuentro enfoca riba intercambio di conocimento, conservacion di patrimonio y fortalece cooperacion internacional den area di archivo y historia.
Durante e encuentro, e representantenan di Aruba y Amsterdam a comparti experiencia tocante maneho di archivo historico, digitalisacion di e coleccionnan y importancia di haci historia accesibel pa comunidad y nos generacionnan den futuro. E bishita a pone enfasis riba e rol crucial cu archivo y patrimonio ta hunga den fortalecemento di identidad cultural y memoria colectivo.
Michael Lampe, Embahador Cultural di Aruba, a remarca cu e encuentro tabata hopi inspirador pa Aruba, mirando cu nos isla ta den pleno desaroyo di diferente iniciativa relaciona cu patrimonio y archivo nacional. Segun Lampe, acceso na nos archivonan y documentacion historico ta fundamental pa compronde nos historia y reforsa nos identidad cultural. “E ta importante pa nos sigui inverti den nos historia y den acceso na nos archivonan. Cooperacion cu institucionnan manera Stadsarchief Amsterdam ta duna Aruba oportunidad pa siña for di experiencia internacional y fortalece nos propio capacidad,” asina Lampe a expresa na salida di e bishita na Amsterdam, Hulanda.
Director di Stadsarchief Amsterdam, Bert de Vries, a indica cu e ta mira cu hopi entusiasmo e plannan cu Aruba tin den area di patrimonio y archivo. Segun de Vries, Stadsarchief Amsterdam ta dispuesto pa coopera cu Aruba riba diferente tereno, incluyendo digitalisacion di nos coleccionnan, maneho di archivo den edificio monumental y desaroyo di exhibicion como tambe acceso p’e publico na tur esaki.
“E ta inspirador pa mira e ambicionnan cu Aruba tin. Nos tin hopi experiencia cu muda y maneha un archivo den un edificio monumental y nos ta contento pa comparti e conocimento aki cu Aruba,” De Vries a comenta durante e encuentro.
E director a destaca tambe cu proyecto nan manera e futuro centro di conocimiento y patrimonio di Aruba tin un balor simbolico importante, pasobra nan ta combina preservacion di monumentonan historico cu funcionnan moderno y innovador pa comunidad.
Anne Witsenburg, director di Stichting Monumentenfonds Aruba, a enfatisa cu e bishita ta representa un paso hopi importante den e proyecto pa desaroya un “Kennis en Erfgoed Centrum” pa Aruba. Segun Witsenburg, e iniciativa ta un colaboracion entre Archivo Nacional Aruba (ANA), Biblioteca Nacional Aruba (BNA) y Stichting Monumentenfonds Aruba.
Witsenburg a señala cu e Stadsarchief Amsterdam ta un ehempel inspirador di con un archivo moderno por integra den un edificio historico mientras cu e ta sirbi comunidad. El a destaca tambe e importancia di cooperacion tecnico tocante conservacion di archivo, acceso publico na documentacion historico y e posicion di un archivo den sociedad moderno. Segun Witsenburg, e relacionnan historico entre Aruba y Hulanda haci cooperacion den archivo aun mas importante, pasobra e documentonan historico por contribui na investigacion tocante pasado di famia, empresa y e historia comparti entre Aruba y Hulanda, incluyendo temaimportante relaciona cu sclavitud y migracion.
Gobierno di Aruba ta considera e encuentro na Stadsarchief Amsterdam como un paso importante den fortalece cooperacion entre Aruba y Hulanda pa yuda preserva nos cultura y historia. Door di inversion den conocemento, patrimonio y acceso na memoria historico, Aruba ta sigui construyendo un fundeshi solido pa preserva su identidad cultural pa generacion presente y esnan den futuro.
{gallery}Gobierno a bishita Stadsarchief Amsterdam pa fortalece cooperacion den preserva patrimonio, archivo y historia di Aruba{/gallery}
