Minister Ursell Arends encuanto Presupuesto Supletorio
ORANJESTAD (AAN): E ley di Presupuesto Supletorio a ser pasa. Manera cu Ministro Ursell Arends ta informa comunidad, cu esey nifica cu un suma di 4,9 miyon Florin adicional a ser aloca pa asuntonan di Adulto Mayor.
Na 2021 (prome cu Covid-19), e suma total di subsidio pa Adulto Mayor a worde fiha na 23.2 miyon Florin. Durante e pandemia di Covid-19 a haci un recorte di di 12,6% den e subsidio pa Adulto Mayor. Cu e presupuesto supletorio a coregi esaki cu un suma di 2.5 miyon Florin. Gobierno a aloca 2.4 miyon extra pa dagverblijf y inloophuizen pa Adulto Mayor.
Pues pronto e proyecto di PASADIA lo inicia primitiendo di trece cambionan grandi den e bienestar di nos Adulto Mayor.
E vision di Minister Arends ta pa e Adulto Mayor keda biba mas largo posibel na cas. E proyecto di PASADIA ta dirigi specificamente ariba e grupo di Adulto Mayor vulnerabel cu ta biba na cas ainda. E meta di e proyecto ta pa envolvi diferente profesional cu ta traha den e sector di cuido pa nos Adultonan Mayor. Ta importante pa reforsa e cuido na cas pa finalmente trece un alivo den e problema di scarcedad di cama den casnan di cuido.
E ta di suma importancia pa establece suficiente PASADIA den tur districto na Aruba. Den luna di juli e prome 2 PASADIA ta habri pa asina trece un alivio pa e situacion di cuido pa e Adultonan Mayor cu ta bibando na cas. PASADIA no ta solamente dirigi ariba e Adulto Mayor pero tambe ta un ayudo pa e cuido informal (mantelzorg). E mantelzorger tin un rol importante pa e Adulto Mayor vulnerabel cu ta biba na cas. Pa es motibo Minister Arends pone atencion ariba e alivio di cuido na cas .
Un otro topico importante cu a ser adresa durante e tratamento di presupuesto ta e tema di abuso di nos Adultonan Mayor. Minister Arends a splica cu lo tuma e prome pasonan pa inicia un Meldpunt contra abuso di Adulto mayor. Esaki lo worde maneha pa Departamento pa Asuntonan pa Adulto Mayor (Directie Ouderenzaken).
Alavez lo cuminsa cu e preparacion di e legislacion pa un Meldput pa Adulto Mayor. Pa esaki lo uza e modelo di meldpunt pa mucha. Pa inicia e proceso aki Minister Arends ta bay institui un Grupo di trabao cu ta consiti di profesional for di e sector di cuido pa Adulto Mayor y husticia cu tin como tarea pa guia henter e trayecto aki. Na Departamento pa Asuntonan pa Adulto Mayor tin un Helpdesk pa duna guia na e Adulto Mayor.
Ministerio di Asuntonan di Adulto Mayor ta satisfecho cu e pasonan cu ta worde concretisa pa asina mehora e cuido y bienestar di nos grandinan.
