Gerencia di ANSA a añadi algo extra na e CAO pa asina comparti cu esnan cu ta genera entrada pa e empresa

Hose Figaroa, Presidente di FTA:

ORANJESTAD (AAN) — Presidente di Federacion di Trahadornan di Aruba (FTA), mr. Hose Figaroa, ta hopi satisfecho di a firma un CAO nobo cu Gerencia di ANSA, den cual tur dos partido ta contento cu ne, y tambe mayoria di e trahadornan.

            Den e conferencia di prensa relaciona cu e acto protocolar di e firmamento di e CAO aki, Hose Figaroa a menciona cu esaki ta e di 23 CAO cu nan a firma durante aña 2023. El a señala cu e partidonan a haci nan maximo esfuerzo pa yega na otro, pero na cierto momento no a logra y mester a ahusta algun parti di e acuerdo y na final, importante ta cu nan a yega na otro y a firma un convenio cu cual ambos banda ta satisfecho y contento cu loke a wordo logra.

            Di parti di FTA palabranan di gradicimento na tur cu a participa durante e negociacion, Gerencia di ANSA y su team negociado, miembronan di FTA pa yega na un CAO cu cual no solamente nan ta satisfecho pero cu por saca beneficio di dje, mutuamente.

            Figaroa a recalca cu esaki tambe ta un muestra di bon boluntad di e doñonan di trabao, pasobra ora gerencia a mira cierto cifranan bon cu a drenta, cu ta mustra cu e situacion ta bayendo miho, no kier a laga esaki pa nan mes, pero a añadi algo extra na e CAO, pa asina comparti cu esnan cu, na final di dia, ta esnan cu ta genera e entradanan.

            “Di nos banda sigur, ta un gesto cu  nos ta aprecia di parti di e Gerencia. Nos por resumi e proceso aki den un palabra: Satisfaccion. Nos ta satisfecho cu e resultado”, Presidente di FTA a conclui.