ORANJESTAD (AAN): Tarifa di productonan di gasolin ta sigui cay keto bay na mayoria skina rond mundo.
E ta cayendo na Europa, na Asia, na Merca, Canada, y den Caribe tambe. Excepto di Colombia unda President Petro cueste loke cueste kier subi prijs di gasolin y diesel.
Prijs di crudo WTI a baha bao di e nivel di $70, aunke OPEC y demas aliado ta sigui corta den produccion di petroleo. Y e prijs di gasolin ta cayendo tambe na e estadonan di Golfo na Merca.
E siman aki na Aruba, Minister di Asuntonan Economico, Comunicacion y Desaroyo Sostenibel, Geoffrey Wever, ta anuncia e prijsnan nobo di benta di combustibel entrante 13 december 2023:
Gasoline unleaded-premium lo baha cu 10,9 cen, pa wordo bendi awor na 237,7 cen pa liter.
Diesel ULS (Ultra Low Sulphur) lo baha cu 20,6 cen, pa wordo bendi awor na 227,2 cen pa liter.
Kerosin lo baha cu 9,4 cen, pa wordo bendi awor na 216,5 cen pa liter. Tur e prijsnan aki ta inclui BBO/ BAZV/ BAVP.
Pa prome biaha den 2023 cu prijs di gasolin Unleaded a baha te na 237,7 cen pa liter.
