Parlamentario Ricky Hoek (MEP):
*Gobierno ta haya pluimpje pa e Presupuesto Supletorio 2023
ORANJESTAD (AAN): Parlamentario Ricky Hoek di Fraccion di MEP ta indica c'un siman nobo ta habri caminda Parlamento di Aruba a trata y aproba e Ley di Presupuesto Supletorio 2023.
Tanto e documentonan di e ley, contestacion di e preguntanan di banda di gobierno y e Najaarsnota 2023 a keda entrega na Parlamento di Aruba. A base di e documentonan aki a haci preguntanan, duna comentario y sugerencia na Gobierno di Aruba.
Un proceso bon encamina
Tanto e ministernan y tambe e profesionalnan di cada departamento, a ehecuta un trabou sublime y a encamina un proceso extenso pa concipia e Presupuesto Supletorio 2023 y e Najaarsnota 2023. Siguiendo e proceso aki, a hiba nos na un bon resultado di un surplus financiero di mas cu 1.9% di nos GDP. Mas den e di dos parti di aña 2023, gobierno a nota cu tin 3 ‘meevaller’ (ganashi inespera).
Den caso cu gobierno encontra un ‘meevaller’ den su presupuesto, mester atende cu e suma aki segun e protocol di 2018, caminda ta indica cu 50% mester bay pa pago adicional pa reduci e debe di pais y 50% ta bay pa financiamento di inversion adicional. E tres ‘meevaller-nan’ ta encera: a) interes di bono halto na un suma di Afl. 3.2 miyon, b) maneho di inversion y reenforsa den DIMAS pa medio di retributies, leges en rechten na un suma di Afl. 2.9 miyon y c) un ganashi adicional di Aruba Airport Authority N.V. na un suma di Afl. 8.5 miyon.
E sumanan di e meevaller-nan aki mas e surplus di 1.9% ta yega na un total di Afl. 58.8 miyon adicional riba e presupuesto di pais Aruba. Di e suma grandi aki, Afl. 29.4 miyon lo bay na inversionnan pa Pais Aruba. E inversionnan ta wordo scogi a base di un lista di prioridad cu e Comision di Evaluacion di Inversion ta stipula.
Conseho positivo di CAft
Conforme articulo 10 di e Landsverordening Aruba financieel toezicht (LAft) gobierno a pidi un conseho riba e cambionan presupuestario y e Najaarsnota 2023 na CAft. E ‘sentencia’ di CAft ta positivo y ta bisa cu ‘Aruba ta sigui cumpli cu e standarnan presupuestario’.
E prome punto ta menciona cu Aruba ta cumpli cu e rekisito di tin un presupuesto cu un surplus di 1%.E di dos punto ta bisa cu e meta pa tin un quota di saldo di 70% di e GDP pa aña 2027 ta factibel. Na di tres luga ta bisa cu Aruba ta cumpli na e personeelslastennorm. Por ultimo, cu pa medio di e Najaarsnota por constata cu Aruba ta mantene su mes na e reglanan di ‘budgetdiscipline’ (disciplina presupuestario).
Ta un hecho historico cu Aruba ta presenta un presupuesto cu un surplus di 1.9% y caminda Gabinete Wever-Croes II ta demostra di ta traha na un finansas sostenibel y saludabel pa pais Aruba. Tanto Gobierno di Aruba y e profesionalnan financiero merece un ‘pluimpje’ pa e excelente trabou cu nan ta bin ta ehecuta desde 2021, Parlamentario Hoek a expresa.
