E ta mas caro cu Aruba
PHILIPSBURG: Gobierno di isla di St. Maarten a indica cu debi na e aumento drastico riba mercado internacional, nan a haya nan obliga di hisa prijs di gasolin riba e isla.
Diasabra cu a pasa, esta 18 di Juni 2022 pa 6:00 am, e prijs di gasolin Unleaded a subi for di 282,2 cent pa liter, pa awor 329,4 cent pa liter. Pues ciudadanonan di St. Maarten a haya nan confronta cu un aumento di 47 cent pa liter.
E ultimo biaha cu prijs di Gasolin a wordo ahusta na St. Maarten tabata 11 di April 2022.
Gobierno sa di e critica cu nan lo bay haya, y pesey a agrega cu e prijs di combustible pa wordo influencia pa un monton di factor cu ta fuera di control di Gobierno, y como un pais cu no ta produci petroleo, mescos cu hopi otro, lo bay sinti e efecto di e factornan externo aki.
Prijs di Diesel sinembargo a cay cu 13 cent, pues ta wordo bendi awor na 256,2 cent pa liter.
St. Maarten ta conseha chauffeurnan pa ahusta nan habito di maneha auto, evita di core demasiado duro como cu esey ta consumi mas combustible, y percura pa bo auto a haya un bon tune-up. Evita coremento innecesario, y core lo mas eficiente posible.
Compara cu Aruba: Na Aruba desde 8 di Juni 2022, prijs di Gasolin Unleaded ta 321,2 cent pa liter, y prijs di Diesel ta 290,3 cent pa liter.
E siguiente cambio di prijs di combustible na Aruba lo socede te dia 13 di Juli 2022.
