Gabinete Wever-Croes II a firma e programa di gobernacion 2021-2025

Aruba mester di nos tur! --- ORANJESTAD (AAN): Dialuna 22 di November, durante un conferencia di prensa, Gabinete Wever-Croes a firma e programa di Gobernacion ‘Aruba mester di nos tur’ pa gobernacion 2021-2025.

            Tur Minister tabata presente na e ocasion aki. For di dialuna e programa di gobernacion lo ta disponibel pa henter comunidad.

            Despues di 2 luna di gobernacion, exactamente 63 dia despues cu a huramenta, Ministernan di Gabinete Wever-Croes a entrega nan vision pa e siguiente temporada di gobernacion.

            Cu e periodo di e gobernacion nobo, Pais Aruba ta dirigi su vision riba prosperidad sostenibel cu e meta pa ofrece e ciudadanonan un calidad di bida digno. E vision, meta- y puntonan di salida ta dirigi di tal forma cu su implementacion ta cuadra cu e metanan di desaroyo (SDG’s).

            Pa realisa obhetivonan den e proximo periodo di 2021-2025, Gabinete Wever-Croes II, cu ta consisti di un coalicion entre partidonan Movimiento Electoral di Pueblo y Raiz, Aruba henter por conta cu lo concentra su empeñonan tanto den cada ministerio como e cooperacion estrecho riba nivel inter-ministerial cu lo ta e base pa brinda Pais Aruba un Gobierno solido y stabil.

            E compromiso pa sirbi  Pais Aruba ta ancra den curazon y e realisacion di esaki ta ancra den e cooperacion. E yabi pa exito ta den promove  colaboracion, cooperacion y participacion di tur esnan envolvi fihando riba metanan comun pa resolve problema y enfrenta retonan.

            GWC II  ta consciente cu e retonan ta grandi, y oportunidadnan ta menos, pero e forsa di creatividad y e forma innovador di ciudadanonan di nos pais, lo ta nos yabi pa exito. Consciente cu un actitud negativo ta laga bo mira solamente reto y problema y cu un actitud positivo ta laga bo mira mas oportunidad y solucion, nos ta enfrenta e 4 añanan nos dilanti cu positivismo.

            Vision, determinacion y curashi di henter nos comunidad, lo hiba nos riba e caminda di progreso y bienestar, cu un economia mas fuerte y resiliente, y un autonomia aun mas fuerte.