Decision positivo pa corta e recorte di 5.5 porciento dunado di cuido
*Dangui Oduber e persona indica pa studia dependencia total AZV
*Den formulacion di e mundo nobo por suavisa caracter obligatorio?
ORANJESTAD (AAN) — Por considera e periodo di 2017 pa 2023 como un tempo di prueba pa Aruba debi na e cantidad di problema cu el a presenta pa e pais.
Ta hustamente den e circumstancianan mas dificil, solucionnan practico ta mira luz.
Den e situacion aki tambe, Aruba a haya oportunidad pa huzga su dirigentenan y sin duda den e grupo di gobernantenan cu mas a resalta, a topa cu e politico Dangui Oduber.
E lo keda recorda pa e forma con den crisis, el a sa di atende el a sa di atende cu Turismo cu a sufri un atake historico combina cu e responsabilidad pa Salud Publico, cu casi a mira por ehempel hospital como difunto, ora el a wordo entrega como herencia na Dangui Oduber.
Ora mira atras riba e trankilidad den Hospital, mester duna credito na e tremendo trabou di Ministro Dangui Oduber cu a atende cu e plaganan cu a ataca Hospital y Cuido Medico di Aruba.
Ta cu e confiansa cu aki tin un gobenante capaz, cu logronan concreto riba su terenonan, e momento a yega pa presenta e pregunta, si Dangui Oduber no ta e persona adecuado pa crea un dimension nobo pa e base financiero di Cuido Medico.
E hecho cu Cuido Medico, e parti cu mester entrega e posibilidadnan di Salud Publico na Pueblo, mester a enfrenta atakenan severo di sucesonan, ta subraya nos pensamento original riba un Seguro Medico nacional, cu caracter obligatorio.
Pa cuminsa mester keda realistico y acepta cu den e situacionnan cu a presenta na Aruba, tur seguro medico a wordo seriamente afecta.
E pandemia covid-19 directamente a mishi na un forma inespera, cu e motibo cu mundo conoce seguronan medico cu ta pago di e debenan cu malesa ta haci necesario.
Los di e forma unico cu mester a percura pa mas fondo na forma urgente, mester mira resultadonan tambe cu e malesa a nifica riba termino largo. Ademas mester acepta cu e presencia di un base medico aceptabel na Aruba, a haci e posibilidad pa atende cu e pandemia mas factibel cu na paisnan cu no tin un infrastructura di Salud Publico manera Aruba conoce.
Covid-19, sinembargo, a deshaci di e entrada necesario pa AZV, manera documentacion awor ta confirma.
Tur seguro medico na mundo a conoce problema, pero e seguronan cu mas forsa, tabata e seguronan internacional cu un cantidad mucho mas amplio di asegurado y hasta na diferente pais, cu ta carga e seguro.
Tin mas factor cu ta diferencia un seguro local manera AZV for di un seguro internacional independiente, cu na nos opinion, ta haci necesario pa tin opcion di mas seguro medico, manera semper nos a boga.
Na nos parecer, Ministro Dangui Oduber tin e calidad necesario pa atende e posibilidad aki, sigur den un mundo di cambionan grandi, manera nos ta presenta na Aruba na caminda pa 2023.
Mientrastanto, Aruba atrobe mester aplaudi su sector di Salud Publico cu tabata e instrumento mas importante di Aruba ora morto a bira e menasa grandi pa Pueblo den e atake di Covid-19.
Sigur mester aplaudi e forma cu Ministro Dangui Oduber y tur sector di Salud Publico, a percura pa den temponan dificil, Salud Publico tabata un garantia pa Pueblo di Aruba.
Ta den e sentido aki sigur nos mester hubila ora ricibi e noticia cu ta corta e recorte di 5.5 porciento na December 2022, mientras ta studia e opcion pa 2023.
Aruba a skirbi un pagina nobo di superacion di crisis y ta duna animo pa sigui dilanti.
