Un pais rico den necesidad social di 795 Miyon Dollar pa Pueblo
*Maduro tin yabi di frontera Aruba pero Aruba ta cu Guaido
*Compania Mericano Chevron esencial pa e aliado di Rusia
ORANJESTAD (AAN) — Un cantidad di aspectonan controversial, ta uni awe ora “Gobierno y Oposicion” di Venezuela mester sinta na mesa atrobe den intentonan internacional pa e pais yega na un reconciliacion politico cu mester wordo considera como normalisacion.
Na prome lugar ta bini dilanti na cual pais, kende ta Presidente di Venezuela aunke cu na Venezuela mes, tur pais mester atende cu Nicolas Maduro como dirigente di e pais, loke tur pais ta parce di a acepta tambe.
Pero tin asunto cu mester wordo regla.
E dos gruponan politico di Venezuela, ta personifica tambe e realidad di Venezuela cu Nicolas Maduro tin completamente den su gara pa medio di eleccionnan cu paisnan liber, cu razon, no por acepta.
Segun mundo liber, Nicolas Maduro ta un impostor mescos cu su Gobierno, pero cu kende mundo mester yega na acuerdonan cu hasta ta encera e apertura di frontera di Aruba.
Talbez e realidad cu ta Nicolas Maduro tin e yabi pa habri frontera entre Aruba y Venezuela, ta haci nos tur realisa e naturalesa di e problema. Aruba a acepta Guaido como Presidente y despues di e prome temponan a keda mescos cu mayoria di pais, den silencio riba kende ta dirigi Venezuela of no.
Pa “buena marcha” ta atende cu Nicolas Maduro como Presidente.
Uno di e asuntonan importante pa economia di Venezuela, ta e hecho cu segun sancionnan, e compania Chevron mester di permiso special di Gobierno Mericano. Pero den esaki Juan Guaido ta bini dilanti como e Presidente cu segun Merca mester dicidi den e asunto, mientras na Venezuela ta Nicolas Maduro ta beneficia di e entrada cu Chevron ta genera pa Venezuela y ta esencial pa e pais cu problema serio.
Awe pues e dos basenan politico di Venezuela mester cuminsa reuni y yega na un acuerdo pa cantidad di asunto cu ta mishi directamente cu e bienestar di e Venezolano.
E ayudo humanitario cu Venezuela, cu naturalesa a haci uno di e paisnan mas rico na mundo, mester di atencion.
Mester papia di condicionnan pa eleccion na 2024, cu ta otro punto interesante pasobra resultado di eleccion ta hustamente loke ta produci uno di e divisionnan mas grandi na Venezuela y ta laga e pregunta, ta kende ta dirigente di e pais realmente, habri.
Tin hopi punto cu ta wordo discuti entre loke ta presenta su mes como Gobernacion (Maduro) y Oposicion (Guaido) na Venezuela pero cu pa mundo liber ta Impositor (Maduro) y Gobernacion (Guaido).
En todo caso e dos gruponan ta di acuerdo riba e hecho cu e pais rico mester papia di un yudansa necesario di 795 Dollar pa Venezolanonan sobrebibi nan condicion di bida, pa proyectonan, pa salud, higiena, cuminda y tanto otro aspecto.
E preguntanan mas serio no ta wordo discuti aparentemente.
Esaki ta nifica cu mundo lo no haya informacion si Guaido ta bay sostene e acuerdonan cu Maduro tin firma cu Rusia y Iran of si Maduro. Algo cu sigur ta interesante pa mundo, mientras Aruba mester asumi cu ta Nicolas Maduro tin e yabi di frontera entre Aruba y Venezuela den su man.
