ORANJESTAD (AAN)-- Matutino DIARIO a entrevista señora Marllory Medina, Presidente di “Fundacion Venezolanos Unidos en Aruba” ken a bin comparti informacion tocante nan proyecto “Comedor Popular” pa pueblo di Aruba en general.
INICIATIVA:
Marllory a relata cu e comedor popular tabata su propio idea y iniciativa, for di aña pasa, na luna di Augustus, cu un grupo di 180 persona refugiado na Aruba, y cu el a tene via WhatsApp.
“Door cu mi a wak hopi necesidad den e comunidad, mi a traha un sopi pa 180 persona, asumiendo ami mes e gastonan pa yuda tur hende cu un sopi.
Mi a cumpra tur e material y den mi cas, hunto cu e miembronan di e fundacion nos a prepara e sopi, y nan a yuda reparti esaki full”.
E siguiente siman e fundacion a recauda placa pa cumpra galiña y soseishi cu batata pa nos varia, tambe pa yuda e personanan aki. Despues nos a bin cu un bazaar cu a resulta un exito rotundo, unda nos a recauda mas fondo pa e 100 muchanan di e fundacion. Nos a sigui un siman si, un siman no cu e cuminda pasobra e necesidad tabata hopi. Despues di esey mi a bin cu e idea di un comedor popular pasobra e miembronan a bira mas”.
Palm Beach Plaza Mall a ofrece e fundacion su tercer piso, patras di nan edificio, pa e comedor popular aki tuma lugar pa atende mucha, adulto y hende di edad grandi.
PROXIMO BAZAAR:
Marllory a conta nos cu e fundacion lo tin un bazaar dia 27 di Juni aki y 11 di Juli proximo, di 9’or di mainta pa 5’or di atardi. |
“Tur e articulonan cu nos tin di donacion, nos lo bende nan na un suma simbolico. Nos tin zapato pa mucha homber y mucha muher, y tambe pa adultonan. Tambe nos ta bay bende cuminda pa recauda fondo, na Bakval-12 C.
Ora nos ta cuminza cu e comedor popular nos lo anuncia e hora y dia specifico. E ta bay bira tur Diadomingo di 11 di mainta te 2 or di atardi”, Marllory Medina a indica.
TRANSPORTACION:
Tambe ta bay tin un bus pa transporta e muchanan cu un mayor y esnan di edad grandi, cu ta sali di e terminal di bus di Playa, pa e localidad unda e comedor popular ta bay ta, y nan ta bay tin un lista di tur e muchanan y hendenan grandi cu ta subi den e bus pa bay y bin bek. E muchanan lo haya un identificacion.
ACTIVIDAD RECREATIVO:
Un profesor ta bay duna e muchanan gimnasia ritmico, gratuitamente. Y tambe un persona ta bay duna terapia di baile pa mucha y grandi, gratuitamente. “Ademas nos tin payaso y magonan, y tur siman nos ta bay cambia, pa trece variacion. Ora nan ta caba e les, nos ta duna nan e cuminda como comedor popular. Si tin hende cu tin mester di yudanza nos por duna nan e cuminda, y si ta mucha di scol nan por bin bisti cu un short y un flanel blanco, y nos ta pone nan un curazon cu e simbolo di e fundacion, como identificacion, pa nos sa cu nan ta den e sistema. Nos ta bay organiza competencia di diferente wega, manera baile di apple, entre otro, y nan lo haya premio. E intencion ta pa henter famia integra den e comedor popular aki”, Marllory a agrega.
Si tin personanan cu por haci donacion di flanel di scol basico of preparatorio tambe por bin e dia aki, pa haci esaki.
VISION PA UN SEDE:
“Nos di Fundacion Venezolanonan Unidos de Aruba, a pidi tambe un tereno di gobierno, na Departamento di Infrastructura y Planificacion, pa lanta nos propio lugar pa bira nos sede principal di e comedor popular cu tin e mision di yuda otro”, Marllory a conclui.
E ta gradici e personanan y e empresa cu a colabora pa nan Proyecto Comedor Popular, bira posible.
