Fundacion Venearuba Solidaria cu entrega di certificado pa nan curso di Ingles y Papiamento

Papiamento y Ingles como herment di integracion y  progreso

ORANJESTAD (AAN):  Diabierna mainta a tuma lugar na Fundacion Venearuba Solidaria - La Casa del Venezolano -, e ceremonia di entrega di certificado na un grupo di persona cu a finalisa exitosamente e programanan di Ingles y Papiamento, den nan di dos edicion.

            E participantenan a acudi yen di alegria y motivacion pa ricibi nan certificado di Papiamento Basico + Conversacion como tambe di Ingles A1 y B1.

            Den presencia di e representantenan di e fundacion, Sr. Luis Zarraga y Sra. Grislynn Hernandez, como tambe di e facilitadornan, Sergia Betancourt (Ingles) y Yorleny Oduber (Papiamento), e gruponan respectivo a ricibi nan diploma.

            Esaki sigur ta algo di elogia ya cu ta trata di un grupo di imigrantenan, cu ta forma parti di un generacion nobo cu sa di e importancia di idioma pa asina nan por ta mihor integra den e comunidad di Aruba, na nivel cultural, pero tambe den mercado laboral. Masha pabien!

            Mester menciona cu esaki ta e di dos biaha cu e fundacion ta organisa e cursonan aki exitosamente den forma gratuito. Pronto nan lo inicia cu e di tres yamado na esnan cu ta interesa den participa di e cursonan aki.