Fundacion Stylo Aruba ta lansa proyecto 'Papiamento ta mi idioma'

Melvin Boekhoudt a splica di e proyecto:

ORANJESTAD (AAN):   Diahuebs mainta, Melvin Boekhoudt, cabesante di Fundacion Stylo Aruba a haci lansamento oficial di e proyecto 'Papiamento ta mi idioma', esaki den cuadro di e celebracion di 21 aña di Papiamento como idioma oficial na Aruba, banda di Hulandes.

            E proyecto aki ta bay dura henter un aña caminda lo tin algun evento pa promove uzo di idioma Papiamento.

            E fundacion, a bisa, ta percura pa e proyecto 'Papiamento ta mi idioma'. For di aña 2003, Papiamento a bira un idioma banda di hulandes caminda Papiamento cu Hulandes a bira ruman di otro.

            E proyecto tin como meta promove "nos propio lenguahe". Fo'i hopi aña caba a bin ta ripara cu Papiamento cu ta reconoci na Aruba, Boneiro y Corsou no ta wordo balora aki na Aruba. Aruba a concentra hopi den otro idiomanan, Boekhoudt a indica.     P'esey a yega tempo pa cuminsa balora nos propio identidad.

             E prome actividad cu ta bay haci e aña aki ta 'Ban Busca Palabra'. Esaki ta encera busca palabranan di antes, cu nos grandinan tabata uza. Otro proyectonan lo encera cuminsa motiva e hobennan. y mirando cu gobierno a bin cu e plan di introduci Papiamento na e scolnan basico, e fundacion tambe ta bay cuminsa bishita diferente scol.

            E iniciativa aki a nace tres aña pasa pero awor e ta inicia oficialmente. Ta bay tin bannernan, poster, sticker, poni na diferente caminda pa asina cuminsa promove idioma Papiamento.

            DIARIO a puntra Sr. Boekhoudt si nan lo tene cuenta cu ortografia y gramatica oficial y el a duna di conoce cu si. Nan lo haci uzo di Papiamento di Aruba pa promove e idioma.

            Banda di esaki a anuncia cu otro aña lo tin un competencia di pintamento. Mas detaye lo wordo anuncia despues.