Fundacion Savaneta a entrega scol un ‘greenhouse’ pa planta aden

ORANJESTAD (AAN): Scol a caba di habri, y ya caba e bon hendenan di Fundacion Savaneta Aruba a regala e scol basico, Colegio Sagrado Curazon di Savaneta un bunita regalo.

   Ta trata aki di un ‘Greenhouse’ pa asina e alumnonan por bay cuminsa planta mata di fruta y berdura aden.  Fundacion Savaneta ta manda bisa danki na nan patrocinador Kooyman cu a sosten e proyecto sostenibel aki, pa muchanan siña mas di agricultura.  Esaki tabata parti di e Proyecto Duna un Man pa Savaneta.  Pues por mira cu e Fundacion a priminti, y awor a cumpli.

   Awor hunto cu Santa Rosa, lo sigui cu e parti di educacion pa e muchanan y crea conciencia cu seguridad di cuminda ta importante na Aruba.  Nan ta gradici Bon Bini Cargo pa ayudo cu nan forklift tambe.