Riba e di 105 aniversario di su nacemento
ORANJESTAD (AAN): Un capitulo nobo den historia cultural di Aruba a cuminsa. Cu honor, vision, y un sentido di proposito renoba, a lanta un fundacion nobo pa sigui proteha y hiba dilanti e herencia poderoso di e icono cultural stima di Aruba, Padu Lampe.
E Fundacion Padu Lampe recien funda ta bay ta esun encarga pa mantene e legado di nos Padu del Caribe bibo pa garantisa cu e spirito di Padu ta sigui biba y hala rosea den scolnan, riba escenario, den curason di artistanan hoben, den e letranan di cancionnan cu no ta skirbi ainda y tambe sigui cultiva e sentido di orguyo di tin Padu Lampe como nos tata di cultura den cerca tur generacion.
Fundacion Padu Lampe lo produci programanan cultural impactante, lansa esfuersonan educativo, y crea espacionan unda Aruba su alma cultural por wordo cultiva, honra, y comparti cu mundo.
Pero tambe e lo bira e anfitrion oficial di e cas di Padu, cu plannan ambicioso pa transforma e residencia iconico aki den un museo interactivo dedica na e musica, bida y impacto di un di e yiunan mas celebra y stima di Aruba.
E fundacion anterior a wordo disolvi cu dignidad, y cu gratitud profundo, e antorcha a wordo pasa pa e fundacion nobo.
Sra. Alice van Romondt, ex presidente di e directiva original, a guia e transicion cu dedicacion y curason. Awor e ta sirbi como un consehero di confiansa pa e directiva nobo, sigurando cu e spirito di continuidad y respet ta keda den e nucleo di cada desicion.
E liderazgo di e fundacion nobo ta encarna un mescla vibrante di forsa creativo, vision strategico, y entrega incondicional na e legado di nos isla. Liderando e fundacion den e era nobo aki ta Edjean Semeleer, empresario cultural, artista arubano stima, y visionario incansabel, cu awor ta fungi como Presidente di Fundacion Padu Lampe. Banda di dje, Arthur Loefstok, arkitecto, diseñador y mente creativo, ta ocupa e rol di Secretario/Vice Presidente, guiando cu inspiracion y maestria.
E directiva ta fortalece su base cu orguyo y gratitud, incluyendo: Silvia Gildhorn, profesional administrativo-financiero, columna di stabilidad y maneho confiabel di e fundacion, como Tesorero; Graciela Nedd-Cheng, bibliotecaria-documentalista dedica na preservacion y digitalizacion di e memoria historico di Aruba, como miembro di directiva; y Vivian Lampe, miembro di famia, un pilar firme di continuidad y protector pasiona di e soño eterno di su tata, como miembro di directiva.
Banda di e mision pa mantene e legado di Padu bibo di e mihor forma posibel, nan ta trahando hunto riba un vision transformativo: pa crea un museo interactivo y bibo cu no solamente ta celebra e contribucionnan di Padu pero tambe ta educa y inspira e generacionnan cu ta bini.
Fundacion Padu Lampe ta comprometi na carga e herencia aki cu excelencia, amor y vision cultural cu curashi. Cu sosten di comunidad y futuro partnernan, e herencia di Padu Lampe no solamente lo wordo conserva pero eleva na alturanan nobo. Convirtiendo e cas di Padu Lampe den un fuente di orguyo di Aruba y un destinacion cu mester wordo experencia pa local y nos huespednan internacional.
Ya caba e proyecto aki ta lantando hopi entusiasmo, no solamente pa loke e ta representa, pero pa loke e lo crea: un oportunidad pa Aruba lidera cu cultura. Pa mustra mundo cu islanan chikito ta carga historianan gigante, y cu herencia, ora e wordo honra cu vision, ta bira e simia di innovacion, educacion, y orguyo nacional.
Esaki no ta djis e continuacion di un herencia. Esaki ta un renacemento.
