Ivonne Andrade, Fisioterapista:
ORANJESTAD (AAN)—DIARIO a entrevista e Fisioterapista Ivonne Andrade-Caiaffa, ken a informa cu ta bay cuminza cu e programa di Fundacion Movimento ta Bida; e programa di Fitness Fit, y nan ta invita e comunidad di Aruba pa participa den dje.
Andrade a indica cu mayoria ta pa hende di edad grandi, 60 plus, pues un programa pa adulto mayor, na unda ta bay traha cu nan movilidad, ekilibrio, canamento, forza, pa nan ta den actividad fisico mas activo y independiente posible.
El a splica cu e programa aki nan lo haci’e hopi leuk, na un manera pa integra nan mes, pa nan pasa den un rato agradabel, y cu ta consisti di fortalecimento di nan musculonan y wesonan.
Nan ta bay controla e adultonan mayor nan presion y nan curazon, y tur esaki nan lo evalua prome cu nan cuminza cu e actividad.
Andrade a señala cu si resulta cu e persona ta sufri di algo lo haci e programa un tiki diferente pa nan, cu ta e grupo di asistencia special unda lo enfoca un tiki mas individual, segun e necesidad di cada participante. Ta hopi importante pa nos grandinan haci movecion, keda activo y no sinta full dia wak television, pa nan no bay atras, pa alomenos mantene loke nan por. E fundacion ta busca mehora nan, pero si e no sosode asina lihe alomenos keda na unda nan ta. Pesey nan ta bay traha riba ekilibrio, coordinacion, movecion, pues mantene e curpa activo.
