ORANJESTAD (AAN): Recientemente, Minister di Enseñansa y Deporte Endy Croes a asisti na un reunion di Hunta di Supervision hunto cu e bestuur di Fundacion Lotto pa Deporte.
Durante e reunion, e bestuur a confirma cu a finalisa Cuenta Anual 2020, Cuenta Anual 2021 y Cuenta Anual 2022. Nan a splica cu e manera cu nan a ricibi Lotto pa Deporte di e maneho anterior na aña 2021, a costa nan hopi trabao. Mirando cu tabatin 2 diferente administracion, tabata dificil pa pone nan hunto pa tin e cuentanan anual na tempo.
Pues, nan ta sumamente contento cu e maniobra cu nan a haci pa haal in e trabaonan atrasa. Tambe, nan a haci un promesa cu dentro di dos luna Cuenta Anual 2023 lo ta cla y aproba. Fuera di esaki, nan a garantisa cu desde otro aña den e luna di juni, Cuenta Anual 2024 lo ta cla, cumpliendo cu e Statuut.
Nan a splica cu e maneho anterior di Lotto pa Deporte tabatin “credit line” na banco y tabata constantemente den cora. Un total di 1.6 miyon Florin den cora, cual tabata costa Lotto como 15 mil Florin di interes pa luna. Den transcurso di 1 aña y mey, a logra bah’e na 0 back.
Actualmente nan no ta uzando “credit line” y tin un maneho coherente cu ta scapa hopi placa cu por uza pa deporte. Fuera di esaki, nan a splica loke nan tin reserva pa e proyectonan y pa Stichting Sportsubsidie Aruba (SSA). E aña aki SSA a ricibi pa prome biaha den historia 4.3 miyon Florin. Pues ta logrando pasonan grandi y historico.
E mandatario di Deporte a expresa cu e ta hopi contento cu e presentacion cu el a ricibi y ta felicita nan pa e fase nobo cu nan ta bayendo aden cu e traspaso di Lotto den su totalidad, di acuerdo e contractnan firma cu CBN. Finalmente, Minister Endy Croes ta felicita Fundacion Lotto pa Deporte pa e gran trabao cu nan ta haciendo.
