ORANJESTAD (AAN): Rish-Ann Ammerlaan- Trahador Social di Fundacion Contra Violencia Relacional (FCVR) a duna di conoce cu lo cumisa cu nan campaña mundial 'Orange The World' cua ya caba tin algun aña participando na esaki caba.
Esaki ta bay inicia awe 25 november te cu 10 di december pa haci hende consciente di maltrato.
El a splica cu durante e di 16 dia di activismo aki conhuntamente cu otro fundacionnan ta bay realisa diferente actividad pa crea conciencia riba e tematica di violencia contra hende muher y mucha muher.
Ammerlaan a agrega cu e aña aki FCVR tin e tema di Orange The World di Hulanda cu ta: 'Veilig, overal en altijd' cu ta nifica seguridad tur caminda y tur ora. Pa cu esaki a haci diferente actividad. A sinta cu diferente organisacion pa asina crea un agenda pa e parti di concientisacion.
Tin actividadnan manera workshop conhuntamente cu CMMA y Futura pa mucha muhernan entre 12 cu 18 aña cual lo tuma luga na diferente MFA rond di Aruba.
Awe 25 di November lo tin e lansamento oficial cu ta tuma lugar na Bestuurskantoor unda lo ilumina e edificio na color oraño pa asina demostra cu nan ta sostene e campaña.
Tambe tin workshopnan hunto cu Centro Desaroyo Humano na Impact Hub, a bisa.
Banda di esaki, Rish-Ann Ammerlaan a menciona cu tambe tin actividadnan di Stimami Guiami pa mamanan cu ta cliente di FCVR cu tin yiunan entre 2 aña y mey pa 4 aña.
Comunidad por participa den e campaña aki iluminando bo cas of edificio na color oraño pa asina demostra cu abo tambe ta contra violencia contra hende muher.
Tambe lo ta lansando e siman aki e prome video di un serie caminda cu ta entrevista diferente persona den comunidad pa wak con e seguridad di hende muher ta aki na Aruba, Ammerlaan a indica.
