FUNARI a cumpli 44 aña dunando bek na comunidad

Gabriella Helder, Presidente:

*Ayudo brinda pa Aruba Doet ta un gran logro! 

ORANJESTAD (AAN) – Gabriella Helder, Presidente di Stichting FUNARI (Fundacion Arubano pa e Invalidonan), a duna di conoce cu e ayudo brinda den fin di siman door di Aruba Doet, cu, entre otro, a verf e edificio y lague hopi bunita, ta un gran logro pa e Fundacion, cu ta un di esnan mas antiguo di Aruba.

            Den un entrevista cu DIARIO Gabriella a relata cu Dialuna 13 di Maart awo, nan a celebra 44 aña di existencia, dunando bek na comunidad, y tambe yudando e personanan den rolstoel sinti nan mes inclui den e comunidad di Aruba.

            Funari su rol primordial ta pa saca e personanan cu ta den rolstoel y esnan cu tin otro limitacion, for di aislamento. Y duna nan actividad cu nan ta sinti inclui tur caminda.

            Clientenan di Funari ta haya obra di man, musica, gimnasia cu nan por haci. Kiermen, Funari ta acapara diferente actividad, unda nan por hunga domino tambe, cual ta un parti di actividad social; nan ta haci charla, poesia, y loke Funari ta haci hopi ta invita esnan profesional den e veld, pa duna lectura pa asina concientiza nan clientenan y nan boluntarionan.

            Gabriella Helder a menciona cu, actualmente, nan tin un grupo di 20 cliente cu ta varia di edad. El a indica cu e no por bisa cu nan ta limita, pero nan busnan ta carga aproximadamente 18 rolstoel, y esey ta pone cu nan no por duna e servicio na tur persona. Pero tin clientenan cu ta bisa cu nan famia por trece nan. Tur persona ta bon bini, no solamente esnan cu ta riba rolstoel, pero tambe esnan cu ta cana cu walker.

            Gabriella a señala cu nan ta purba stimula pa Funari haya mas miembro, pero aunke Funari tin 44 aña, hopi hende no conoce, y no sa pakico Funari tey.

            “Nos tey pa brinda e servicio na personanan cu limitacion, y semper nos ta abierto. Si nan yega aki na Savaneta, semper nan lo por haya e informacion necesario pa nan por forma parti di nos famia, pasobra aki na Funari nos no ta considera nan solamente cliente, pero un famia”, Gabriella Helder a expresa.