Frances Rugebregt di IVA a relata tocante e dos dianan di conferencia pa dunadornan di cuido

Inspeccion di Salubridad Publico

ORANJESTAD (AAN) – Señora Frances Rugebregt, funcionario di Inspeccion Volksgezondheid Aruba (IVA), den entrevista cu DIARIO a elabora tocante un conferencia cu IVA a organiza pa dunadornan di cuido, e dianan 25 y 26 di November aki.

Rugebregt a splica cu den e conferencia a enfoca riba 5 tema cu a bin dilanti den e cinco añanan cu a pasa di IVA, entre nan Leadership y Comunicacion, cu ta sumamente importante y eynan e ta papia di kehonan cu nan ta ricibi y e calamidadnan cu e dunadornan di cuido mes ta entrega.

E cinco temanan aki tin influencia riba e calidad di cuido cu ta worde duna na Aruba. Diferente funcionario di IVA ta dunando e charlanan basa riba nan mes experiencia. Por ehemplo, un orado ta papia di comunicacion en general, y tin un persona di e veld di cuido mes, cu a duna un ehemplo di con esaki ta traha den practica mes.

E dunadornan di cuido mes ta duna un presentacion pasobra nan sa précis kico ta going on den e veld, pa asina nan sigui dilanti den e siguiente añanan.

E idea ta pa IVA sinta cu e cuidadornan di cuido regularmente, pa nan duna siguimento na e puntonan cu a worde treci dilanti y wak con leu nan ta cu esey.

Durante e ultimo cinco añanan IVA a topa cu diferente iregularidad y nan boet y hasta cera algun practica. IVA mester di e cooperacion di e dunadornan di cuido y nan input pa nan por traha hunto pa asina yega na mehoracion. Nan ta esnan cu ta traha cu e pashentnan diariamente y ta traha cu otro tambe tur dia, y nan sa précis kico falta y kico IVA por yuda nan cune pero tambe kico otro coleganan tambe por yuda nan.