Parlamentario Shailiny Tromp-Lee mustrando cu ainda 3.400 famia ta hayando yudanza
ORANJESTAD (AAN) – Fraccion di Partido Movimento Electoral di Pueblo (MEP), a reuni cu Fundacion pa Nos Comunidad, y durante e conferencia di prensa di e fraccion, Dialuna, Parlamentario Shailiny Tromp-Lee, a duna informacion al respecto.
E parlamentario a bisa cu e reunion a bay den un tremendo esfera, y hopi tema interesante fraccion di MEP a trata cu e Fundacion.
“Nos como parlamentario tabata kier sa con nos ta bay atende cu e periodo cu tin nos dilanti y manera pueblo sa, e yudanza cu a worde aproba di 14 miyon tabata te cu December venidero, y den e sentido ey nos kier mira con leu nos ta den esaki”, Tromp-Lee a indica.
E parlamentario a sigui splica cu te cu dia di awe 3.400 famia, activamente, ta haya e yudanza y na su opinion esey sigur lo bira un reto, mirando cu nos ta den October y pa fin di December e yudanza aki lo yega na su final.
“Mi ta kere cu e ta un aspecto cu gobierno mester bay duna su atencion debido. Ami mes ta di opinion cu e parti di Aruba cu kier bay traha, mester keda incentiva pa e grupo cu por keda aloca den e mercado laboral, den un fase hopi lihe worde poni na pia di trabao”, e dama parlamentario a señala.
El a agrega cu tin mas reto pa deal cune, manera cu cada hende carga nan responsabilidad y e ta kere cu na e momentonan aki si e situacion a cambia pa algun persona ta bon pa nan indica esaki, pa nan worde saca for di e lista di famianan cu lo mester di e asistencia aki.
Shailiny Tromp-Lee a agrega cu otro aspecto hopi interesante cu lo mester haya su atencion debido, ta e suma pendiente cu nan tin cu ricibi ainda for di gobierno, pa por acapara e yudanza for di awo te December. “Esey ta trata di 1.3 miyon Florin, algo di nos parti sigur nos ta bay traha riba dje, y fungi como brug pa percura pa gobierno aloca e placa aki mas pronto posible, pa Fundacion pa Nos Comunidad”, e parlamentario a conclui.
