ORANJESTAD (AAN): Fraccion di AVP den Parlamento di Aruba ta expresa su mas sincero pabien na Camara di Comercio y Industria di Aruba (KvK) cu e ocasion importante di su 95 aña di fundacion.
Durante casi un siglo, e institucion aki a hunga un papel vital den desaroyo economico di nos pais, sirbiendo como un punto di referencia pa empresa grandi y chikito, y un socio esencial pa promove un ambiente di negoshi saludabel y innovativo.
Camara di Comercio no solamente ta un registro pa e sector empresarial, sino tambe un entidad cu ta facilita intercambio di conocemento, apoyo y direccion pa entrepreneur.
Fraccion AVP ta reconoce cu un cooperacion eficaz entre e sector empresarial y e sector publico ta clave pa un desaroyo sostenibel y pa fortalece nos economia. Un relacion constructivo entre institucionnan manera KvK, Gobierno, Parlamento y otro entidadnan di interes general ta fundamental pa enfrenta e reto economico y social cu Aruba tin actualmente y pa crea oportunidad pa futuro generacionnan.
E fraccion a manda un felicitacion especial na directiva y tur empleado di Camara di Comercio, cu su dedicacion y esfuerzo constante a haci posibel sigui cu e gran logro aki. AVP ta desea hopi exito continuo den su mision, y ta sigur cu e institucion lo sigui contribui na bienestar general di nos comunidad y pa posiciona Aruba como un destino empresarial fuerte y respeta.
