ORANJESTAD (AAN) – Instituto Pedagogico Arubano (IPA), den e personanan di señora Marylin Richardson y señora Marisol Croes,
a forma parti di e stakeholders cu na inicio di siman, a reuni cu Formador Evelyn Wever Croes y su team, den e cuadro di formacion di e gobierno nobo.
Marilyn Richardson y Marisol Croes a participa despues, den e conferencia di prensa di rigor, despues cu nan a reuni cu Formador.
Marilyn Richardson a expresa cu esaki tabata un combersacion exitoso, den cual nan a presenta un lista cu puntontonan di atencion, cu IPA a pone den diferente categoria, cu nan a discuti cu Fomador Evelyn Wever-Croes y e grupo di personanan cu tabata cune.
Algun di e puntonan aki ta cay den e aspecto di ley (wetgeving), tambe pa e parti specifico di e posicion di e funcionarionan. Ademas a elabora tocante e aspecto di finanzas, personeelsbeleid y finalmente a dedica bastante tempo na diferente desaroyo den e enseñanza di Aruba.
Marisol Croes, di su parti, a expresa cu e parti di berdad mas importante di locual nan a papia cu Formador ta e necesidadnan cu e alumnonan na Aruba tin. “Nos a ripara cu e Formador y su team, tin hopi interes den haci un cambio den e rumbo di e manera con nos ta logra nos innovacionnan den enseñanza, cu e idea di pone nos muchanan na prome lugar. Esaki ta algo cu semper nos a boga pe. Enseñanza na Aruba ta sagrado pa nos, no pasobra nos ta patriotico so y nos ta stima nos Isla, pero vooral pasobra nos sa cu nos Isla tin su propio retonan cune den nos sociedad” Croes a subraya.
El a sigui splica cu esaki ta un necesidad y pa nos muchanan por desaroya cien porciento, mester pone atencion riba dje.
Esey ta haci cu e Instituto di Aruba pa crea maestro tambe mester keda recapacita maestro. E no ta djis un luho, e tin su necesidad, Marisol Croes a subraya. Marisol Croes a referi na e noticianan cu tin den prensa tocante problemanan cu tin den cas, violencia domestico, cu hende di diferente nacionalidad ta biba na Aruba cu nan diferente cultura riba nos Isla y ta imposible pa keda duna un enseñanza cu ta un “one size fits all”. El a subraya cu vooral e discusion y combersacion ameno cu e cu su colega di IPA tabata tin cu Formador, over di kico lo encera cambia enseñanza na Aruba, como sistema, tabata e parti hopi interesante di e combersacion y relevante pa e proximo gobernacion na Aruba.
