E prijs di un mundo industrialisa pa petroleo ta wordo presenta na hende - *Aruba lo bira parti di lama Caribe y mundo un desierto den calamidad? - *Un analisis di loke ta spera na final di Siglo 21 si hende no cambia su bida
ORANJESTAD (AAN) — Na 2013 ya un rapport a exigi hende bati alarma grandi. Industrialisacion cu a avansa y a crea fortunanan grandi pa paisnan productor di petroleo, a bira enemigo mas grandi di hende.
Na Siglo 20 descubrimentonan grandi a cambia cara di mundo, cu a bira mas chikito mientras hende tabata na careda pa forma un bida nobo y un comunidad mundial nobo.
Migracion a conoce realidadnan nobo. Hende a bandona planeta tera pa drenta espacio. Petroleo a produci paisnan rico y poderoso nobo pero tambe a cambia fortuna di hende den un dia.
Petroleo a bira e oro nobo cu a domina mundo y a haci cu un persona cu tabata tin suerte di a cumpra un tereno cu petroleo den suelo, a bira miyonario.
E mundo manera nos conoce actualmente ta na peliger oficialmente sigur despues cu paisnan a reuni pa tuma nota di un rapport, cu manera DIARIO a anuncia for di ayera, ta exigi hende bati alarma grandi.
Awe nos ta analisa e realidad cu ta bini dilanti den e rapport y ta splica con mundo lo sigui bira mas calor, pero tambe conoce horcannan mas peligroso.
Nivel di lama lo subi y sigui subi. Na final di e siglo aki, e nivel di lama na Aruba lo a subi cu dos meter y na 2150 cu cinco meter.
Calor inmenso lo crea secura grandi pero na mes momento yuda nubianan produci mas awasero pisa pa un mundo, cu lo mira ceronan di nieve y ijs dirti y uni cu oceano.
Gobiernonan di tur pais ta bini hunto pa papia di un situacion, cu hopi hende no kier visualisa ni ora nan ta drumi. Un situacion cu a cambia careda di hende, cu ya a dicidi cu mester bini un fin na e oro nobo di mundo, na petroleo.
Kico ta pasa cu hende? Kico lo pasa cu mundo, cu por tuma dos posicion? Mundo por sigui core y haci manera nada ta pasa, pero mundo por haci loke el a cuminsa haci na entrada di e siman aki y para keto pa e cambia rumbo.
Cambio di rumbo ta nifica, cu hende ta busca forma pa cambia energia pero tambe costumbernan cu a nace na Siglo 20 e era di “jet”, cu awor ta bira enemigo di hende y hasta ta wordo considera como un arma contra hende.
E civilisacion cu mundo a conoce na Siglo 20 lo mester cambia.
Pa comprende loke ta pasa awe, mester conoce e historia di mundo, cu a conoce temponan di ijs, tempo di secura grandi y evolucion di e mundo manera nos conoce actualmente cu continentenan y islanan.
E barancanan riba Aruba cu su suela di santo, ta indica riba un ayera cu hende kier lubida.
Kico lo pasa si lama subi cu cinco meter? Kico ta resta di Aruba si e cifranan cu a wordo presenta ta corecto? Naturalmente tin un grado di eror, pero cu nivel di lama lo subi, ta un hecho cu ya por nota.
DIARIO hunto cu Aruba den e proximo dianan lo bay atende un asunto serio. Un asunto cu ya ta cambia nos clima y manera for di ayera nos a mustra, lo cambia tempo na Aruba cu mester tene cuenta cu sistemanan tropical cu ta bira mas pisa den e region.
Pero tambe Pueblo lo ricibi informacion con cada uno por duna su contribucion pa loke te awe mundo kier a trata como un pesadia falso pasobra e lo afecta economia mundial.
E analisis di awe no por tin conclusion cu un solo articulo pero ta habri caminda pa stop e careda di hende, cu tin den su man pa dicidi pa futuro den creacion di un mundo nobo cu cambionan y retonan grandi pa asina salba loke Siglo 21 a pone nos acepta como garantia falso.
Hende tin den su man awe pa dicidi si mundo ta regresa na e tempo di Noah, sumergi pa olanan di lama, cu yobidanan pisa den un clima cu lo destrui bida humano, vegetacion y hasta nos islanan, incluso nos dushi Aruba!
